Дэпартамент дзяржаўнай бяспекі Літвы прызнаў нядобранадзейнай адну з буйнейшых тыпаграфіяў краіны – «Garsu pasaulis», якой планавалася даручыць друк пашпартоў Новай Беларусі.
Міністарка ўнутраных справаў Літвы Агне Білатайце пасля публікацыі сёлета ўвесну расследавання парталу «15min.lt» і «Беларускага расследавальніцкага цэнтру» пра магчымыя сувязі «Garsu pasaulis» з беларускім рэжымам звярнулася ў ДДБ з просьбаю паўтарыць ацэньванне надзейнасці кампаніі.
Пасля таго, як ДДБ адклікаў у «Garsu pasaulis» сертыфікат надзейнасці пастаўніка паслугаў, літоўскі Цэнтр выдачы асабістых дакументаў разарваў з кампаніяй дамову на выраб пашпартоў, паведаміў МУС Літвы. Цяпер міністэрства збіраецца абвясціць міжнародны конкурс закупу бланкаў асабістых дакументаў і запрасіць да ўдзелу ў тэндары як мага больш пастаўнікоў паслугаў з Еўразвязу. Дагэтуль «Garsu pasaulis» брала ўдзел у конкурсах як адзіны пастаўнік паслугаў.
Міністарка ўнутраных справаў зазначыла, што «выраб асабістых дакументаў – гэта асабліва далікатная галіна, таму вельмі важна, каб кампаніі, што ўдзельнічаюць у працэсе вырабу дакументаў, не выклікалі аніякіх сумневаў».
Кіраўніца «Garsu pasaulis» Ана Янаўскіене заявіла, што кампанія плануе звярнуцца ў суд.
,,«Мы лічым пастанову ДДБ неабгрунтаванаю, кансультуемся з юрыстамі, як развязаць сітуацыю ў кароткія тэрміны», – паведаміла Янаўскіене.
Журналісцкае расследаванне літоўскага парталу «15min.lt» і «Беларускага расследавальніцкага цэнтру» выкрыла, што кампанія «Garsu pasaulis» мае дачыненне да бізнесу ў Літве Віктара Шаўцова, бізнесмена, якога называюць «гаманцом» Аляксандра Лукашэнкі, а таксама да бізнесу беларускага манапаліста ў галіне галаграмаў «Галаграфічная індустрыя» ў Літве.
У 2011 годзе кампанія, што кіравала «Garsu pasaulis», разам з Шаўцовым і «Галаграфічнай індустрыяй» заснавала супольнае прадпрыемства «GP Holographics». Пасля пачатку вайны ва Украіне акцыі «GP Holographics», што належалі «Garsu pasaulis», былі прададзеныя праз пасярэдніка Шаўцову. Кампаніі дагэтуль маюць адных і тых жа кантактных асобаў, адміністратара і бухгалтара.
З 2014 года «Garsų pasaulis» выйграла ўсе тры тэндары на выраб пашпартоў у Літве. Апошні з іх быў у 2022 годзе на суму больш за 30 мільёнаў еўраў.
Марыя Міхалевіч belsat.eu
