Турнір, прысвечаны салідарнасці з палітвязнямі, адбудзецца 19 кастрычніка ў Варшаве на стадыёне «Bemowski Ośrodek Piłki Nożnej» (або «Bemowski Center Football»). Удзельнічаць можа любая каманда, якая падасць сваю заяўку і аплоціць стартавы ўнёсак – 300 злотых. Пажадана, каб у складзе каманды было не меней за 10 чалавек. Удзел традыцыйна возьме футбольная каманда «Белсату».
Аб правядзенні спаборніцтва ў гэтым годзе 24 верасня ў сваіх сацыяльных сетках абвесціў сам журналіст, блогер і футбаліст Аляксандр Івулін.
«У 2022 годзе хлопцы арганізавалі гэты турнір у знак салідарнасці са мной і тысячамі іншых палітвязняў, якія апынуліся ў беларускіх турмах ні за што. Год таму «Саша выйшаў», але колькасць палітвязняў не паменшылася. Зараз людзей пачалі выпускаць па памілаваннях, але ў цэлым сітуацыя не мяняецца. У Беларусі па-ранейшаму мінімум 1320 палітвязняў. І калі ў 2022 годзе, знаходзячыся за дротам, я стаў чэмпіёнам калоніі па міні-футболе, то цяпер «жоўтабірачным» забаронена нават набліжацца да пляцоўкі. Таму мы будзем гуляць за іх. Гучыць пафасна, але, калі знаходзішся там, неверагодна прыемна атрымліваць весткі, што пра цябе памятаюць тут», – напісаў Аляксандр Івулін на сваёй старонцы ў Instagram.
Арганізатары плануюць сабраць 24 каманды, якія першымі пададуць заяўкі на ўдзел. Аформіць заяўку можна вось тут. Гэтаю магчымасцю ўжо скарысталася футбольная каманда «Белсату», якая традыцыйна бярэ ўдзел у турніры.
Першы футбольны турнір беларускіх аматарскіх камандаў Польшчы, арганізаваны ў гонар палітвязня Аляксандра Івуліна, прайшоў 14 жніўня 2022 года ў Варшаве. Тады ў турніры ўзялі ўдзел 16 камандаў, сфармаваных з беларусаў замежжа. Пераможцам зрабілася каманда Беларускага фонду спартовай салідарнасці, за якую гуляў другі бамбардзір апошняга чэмпіянату Польшчы Ілля Шкурын. Другі футбольны Кубак Івуліна прайшоў у Варшаве 19 жніўня. На ім перамагла каманда «Free SPOrT United», у якой гуляў экс-футбаліст кіеўскага «Дынама» і экс-трэнер зборнай Беларусі Аляксандр Хацкевіч. У турніры паўдзельнічалі 32 каманды з Беларусі, Польшчы і Украіны. Каманда «Белсату» была адметная тым, што за яе гуляла дзяўчына.
Алесь Няхай belsat.eu
