Сацыёлаг Генадзь Коршунаў прыкмеціў цікавую рэч: у той час як усе кажуць, што на мяжы Беларусі з заходнімі краінамі назіраецца зацішша па наплыве мігрантаў, там насамрэч адбываецца рост спробаў нелегальнага пераходу.
Сацыёлаг Генадзь Коршунаў, які сістэмна адсочвае колькасць спроб нелегальнага пераходу на мяжы Беларусі з краінамі Еўразвязу, падзяліўся цікавым назіраннем.
,,«Дзіўнае робіцца на межах. Усе кажуць, што там цішэе, а лічбы сведчаць, што пакрысе напруга такі расьце... Вось, напрыклад, на мінулым тыдні маем рэкорд па колькасьці атак на беларуска-польскую мяжу – максімум за апошнія 13 тыдняў (больш за 800 спроб). Ну і агульная колькасць спроб нелегальна перакрочыць мяжу таксама максімальная для таго ж тэрміну – амаль 1000», – напісаў сацыёлаг.
Свае словы Генадзь Коршунаў пацвердзіў графікам, на якім відаць, што колькасць спроб пераходу мяжы сапраўды дасягнула найвышэйшага значэння цягам апошніх 13 тыдняў.
Так, паводле паведамленняў польскіх памежнікаў, пачынаючы з панядзелка, 16 верасня, колькасць спробаў сапраўды расла: ад 110 да 165 – у чацвер, а цягам наступных трох дзён, з 20 па 22 верасня, было зафіксавана 300 спробаў нелегальнага пераходу мяжы.
Сапраўды, апошнім часам у СМІ часта можна сустрэць меркаванне, што спрабуючы гандлявацца з Захадам, рэжым Аляксандра Лукашэнкі робіць захады, каб зменьшыць наплыў нелегальных мігрантаў на межах. Але, выглядае, што тут сітуацыя такая ж, як з палітычнымі зняволенымі: адной рукой адпускаючы адных, другой ён набірае новых палітвязняў.
Раман Шавель belsat.eu
