Актывіст Дзяніс Дашкевіч атрымаў паведамленне з беларускага нумара з нагадваннем пра працу «камісіі для вяртання».
«Паведамляю Вам, што ў выпадку жадання вярнуцца на тэрыторыю Рэспублікі Беларусі Вам неабходна да 31.12.2024 звярнуцца ў камісію разгляду зваротаў грамадзянаў Рэспублікі Беларусь, якія знаходзяцца за мяжою, у пытаннях здзяйснення імі правапарушэнняў», – так нейкая Святлана напісала рагачоўскаму актывісту Дзянісу Дашкевічу ў Viber.
Пра гэта паведамляе праваабарончы цэнтр «Вясна». Там нагадалі, што вядомыя найменей як тры выпадкі, калі пасля вяртання ў Беларусь на ўцекачоў заводзілі крымінальныя справы, нягледзячы на зварот у камісію.
Дашкевіч больш за дзесяць гадоў быў рэдактарам рэгіянальнага праекту «Рагачоў Анлайн», вымушана эміграваў у Польшчу пасля выбараў 2020 года. У траўні летась яго аштрафавалі на 720 рублёў за публікацыю фота з прэзідэнтам Польшчы Анджэем Дудам на фоне сцяга польска-венгерскага сяброўства. «Правапарушэнне» кваліфікавалі як «распаўсюд у інтэрнэце прадукцыі, што прапагандуе экстрэмісцкую дзейнасць», бо гэты сцяг нагадвае нацыянальны бел-чырвона-белы.
Пазней, у жніўні, на Дашкевіча завялі крымінальную справу паводле артыкулу аб абразе Лукашэнкі.
Камісію для вяртання «беглых» узначальвае генпракурор Андрэй Швед, у яе складзе – сілавікі, прапагандысты і іншыя заўзятыя прыхільнікі Лукашэнкі. Летась камісія, паводле Шведа, атрымала 150 зваротаў.
Сцяпан Кубік belsat.eu
