Ілья Яшын абнародаваў версію, што «Лукашэнка літаральна абменьвае людзей на дэталі для самалётаў». Палітычны аглядальнік Аляксандр Фрыдман мяркуе, што гэта можа быць праўдаю.
Палітык Ілья Яшын, які сам быў за кратамі і апынуўся на волі ў выніку нядаўняга абмену Расеі з Захадам, зладзіў сустрэчу са сваімі прыхільнікамі ў Вільні, паведамляе «Наша Ніва».
На пытанне пра вызваленне беларускіх палітвязняў у тым ліку шляхам абмену ён запэўніў, што расейская апазіцыя падтрымае усе адпаведныя кампаніі, што ініцыююць беларускія дэмакратычныя сілы:
«Мы зробім усё магчымае, каб прыцягнуць да гэтага ўвагу. Мы са свайго боку робім усё для таго, каб у спісы наступнага абмену былі залучаныя беларускія палітвязні нароўні з расійскімі. Зразумела, што гэта не так проста зрабіць, бо не вельмі зразумела, што, уласна, Захад можа прапанаваць Лукашэнку ў абмен».
Яшын расказаў пра сустрэчы расейскіх апазіцыянераў «з рознымі прадстаўнікамі заходніх краін, у тым ліку на самым высокім узроўні».
«Вы ведаеце, што Юлія Навальная і Уладзімір Кара-Мурза ў апошнія тыдні правялі сустрэчы з прэзідэнтам Байдэнам, з прэзідэнтам Макронам і з канцлерам Шольцам. Юлія нядаўна сустракалася ў Канадзе, яе прымалі на самым высокім узроўні. Я вас запэўніваю, на кожнай гэтай сустрэчы гаворка ідзе ў першую чаргу пра палітвязняў. І ў тым ліку гучаць прозвішчы палітвязняў з Беларусі», – падкрэсліў Яшын.
Ён таксама выказаў здагадку, што Лукашэнка вызваляе палітвязняў у Беларусі з увагі на санкцыі:
,,«Як мне патлумачылі, ён літаральна абменьвае людзей на дэталі для самалётаў. У яго праблема з „Белавіяй”, і яму трэба рамантаваць самалёт, яму патрэбныя нейкія дэталі, якія ён не можа атрымаць праз санкцыі. І ён літаральна абменьвае жывых людзей на дэталі для самалётаў».
Гісторык, палітычны аглядальнік Аляксандр Фрыдман у сваім Telegram-канале напісаў, што лічыць версію пра дэталі за палітвязняў не пазбаўленай рацыі:
«Палітвязняў вызваляюць маленькімі групамі, а Лукашэнка ў прынцыпе не тая асоба, якая пойдзе на гэты крок, не атрымаўшы нічога ўзамен. Нельга выключаць, што гэта насамрэч дэталі. У гэтым выпадку санкцыі працуюць, а абыходзіць іх у рэжыму не атрымоўваецца».
Фрыдман таксама нагадаў пра мноства гістарычных прыкладаў гандлю палітвязнямі, як гэта было, напрыклад, у сацыялістычных ГДР і Румыніі.
Пра апошнюю на сёння хвалю вызвалення палітвязняў у Беларусі стала вядома 16 верасня, тады на волю выйшлі 37 асобаў. За чатыры такія хвалі з 3 ліпеня з-за кратаў выпусцілі 115 вязняў.
Сцяпан Кубік belsat.eu
