18-гадоваму хлопцу цяпер пагражае да 5 гадоў калоніі.
Юнак улічыў неабачлівасць кампаніі, што дае ў пракат электрасамакаты, і скарыстаў банкаўскую картку, на якой не было грошай. Гэткім чынам пасля паездкі з увагі на нулявы баланс з карткі нічога не спісвалася.
Як паведаміла МУС Беларусі ў сваім Telegram-канале, мянчук стварыў 220 акаўнтаў і здзейсніў больш за 600 паездак, за якія не заплаціў. Потым хлопец пастанавіў яшчэ і зарабіць грошай на гэтым ды пачаў пераздаваць самакаты ў арэнду іншым асобам – знаёмцам і тым, каго знаходзіў у інтэрнэце.
«Агулам я зарабіў недзе 700 рублёў», – прызнаўся юнак на «пакаянным» відэа.
Асабліва міліцыянты абурыліся тым, што хлопец «настолькі паверыў у сваю беспакаранасць, што пачаў пісаць скаргі ў службу падтрымання з рознымі прэтэнзіямі».
Нанесеную кампаніі шкоду ацанілі на 33 тысячы рублёў.
На зламысніка завялі крымінальную справу за «прычыненне маёмаснага ўрону без прыкметаў крадзяжу». Яму пагражае да 5 гадоў абмежавання або пазбаўлення волі.
Дзень без аўтамабіля адзначаецца штогод 22 верасня. Задума ў тым, каб аўтамабілісты і матацыклісты хаця б на адзін дзень пераселі на ровары, самакаты або грамадскі транспарт ці прайшліся пешкі і потым часцей аддавалі перавагу альтэрнатыўным спосабам перасоўвання.
У Беларусі сёння зрабілі бясплатны праезд на гарадскім грамадскім транспарце. Для ўдзелу ў акцыі патрабуецца паказаць пасведчанне кіроўцы і тэхпашпарт на аўта. Пры гэтым, напрыклад, у Вільні і Варшаве грамадскі транспарт сёння бясплатны для ўсіх.
Сцяпан Кубік belsat.eu
