20 верасня ў Варшаве прайшоў сёмы з ліку Беларускі бізнес-форум у Еўропе. Больш за 150 удзельнікаў, дзясяткі спікераў, узнёслая атмасфера. Завершылася канферэнцыі, якую ладзіць асацыяцыя ABBA, урачыстым уручэннем прэміі «Бізнес вольнай Беларусі» («Free Belarus Business Awards»). «Белсат» пабываў на форуме.
«Менавіта цяжкасці ствараюць азарт»
У пачатку сустрэчы кіраўнік Асацыяцыі беларускага бізнесу за мяжой ABBA Яўген Буры нагадаў, што сёмы з ліку Беларускі бізнес-форум у Еўропе адбываецца ў дзень народзінаў арганізацыі: ABBA адзначае тры гады дзейнасці.
«Ведаеце, менавіта цяжкасці, з якімі сутыкаецца беларускі бізнес, і змаглі трансфармаваць ідэі ў асацыяцыю, якая аб'ядноўвае бізнесы беларусаў з 13 краінаў свету. Менавіта цяжкасці і стварылі той прафесійны азарт, гэтак уласцівы ABBA», – казаў на адкрыцці канферэнцыі Яўген Буры, прамаўляючы на фоне трох сцягоў – Беларусі (бел-чырвона-белы), Польшчы і ЗША.
ABBA ладзіць такія форумы два разы на год. У звязку з ростам ліку сябраў арганізацыі кіраўніцтва пастанавіла рабіць адну сустрэчу ў Амерыцы, другую – у Еўропе.
Як апавёў Яўген Буры ў размове з «Белсатам», асаблівасць сёлетняга варшаўскага форуму ў тым, што ён стаўся сапраўды міжнародным. Спікеры і ўдзельнікі – з Польшчы, Італіі, Вялікай Брытаніі, Украіны ды іншых краінаў. Але арганізатары форумы – бізнесоўцы з беларускімі каранямі.
,,«Мы хочам, каб беларускі бізнес інтэграваўся ў еўрапейскае кам'юніці, свабоднае і дэмакратычнае, але ніколі не забываў пра сваю нацыянальную ідэнтычнасць», – падкрэсліў Яўген Буры.
«Тыя, хто ўжо прыкіпеў да Польшчы, будуць дзяліцца досведам»
Захаваць беларускія карані бізнесу – асноўны выклік для ABBA, удакладніў яе кіраўнік. Такі бізнес станецца драйверам пераменаў у справе адбудавання вольнай і незалежнай Беларусі.
Тэму беларускасці і вяртання беларускага бізнесу на радзіму закрануў у выступе і заснавальнік кампаніі «GEV», амбасадар АВВА ў Пенсільваніі Віталь Самсонаў. Ён прамаўляў, чаргуючы англійскую і беларускую («Гэта вельмі важна і ў бізнесе – карыстацца роднай мовай») мовы.
«Часта задаюць пытанне: калі Беларусь стане вольнай, як нам вярнуць бізнесы на радзіму? Але ж бізнесоўцы – вельмі мабільныя людзі. Калі дзесьці складаюцца спрыяльныя магчымасці, яны туды хуценька перамяшчаюцца. І вось калі мы зробім такія магчымасці ўнутры краіны, зноў жа, з дапамогай Еўразвязу, праз стварэнне прававой сістэмы, якая б спрыяла бізнесу і інвестарам, мне здаецца, такім чынам вернем у Беларусь вялікую частку бізнесоўцаў. А тыя, хто ўжо прыкіпеў да Польшчы, будуць прыязджаць у Беларусь, каб укладаць грошы ці дзяліцца неацэнным досведам», – спрабаваў зазірнуць у будучыню Віталь Самсонаў.
Дырэктар дэпартаменту замежных сувязяў Польскай гаспадарчай палаты Анджэй Шумоўскі сцвердзіў на канферэнцыі: Польшча ганарыцца тым, што можа прымаць беларускі бізнес-форум на сваёй тэрыторыі – «у цэнтры Еўропы».
,,«Дзякуючы такім сустрэчам будзем будаваць яшчэ большы давер, які станецца падмуркам для добрай двухбаковай супрацы», – адзначыў Анджэй Шумоўскі.
«Заданне не ў тым, каб толькі знаёміцца паміж сабою»
Паводле АВВА, беларусы зарэгістравалі ў Еўразвязе больш за 10 тысяч кампаніяў і стварылі каля 40 тысячаў працоўных месцаў. Але шмат хто сутыкаецца з праблемамі. Аснову, на думку віцэ-прэзідэнткі ABBA Марыны Гірын, складаюць праблемы з легалізацыяй, адсутнасць фінансавання і шырокай базы кліентаў.
«Палякі, напрыклад, працуюць са сваймі кліентамі, а нам трэба выйсці на новы рынак. Таму заданне не ў тым, каб толькі знаёміцца паміж сабой і сядзець у замкнёным коле іншых беларусаў, але каб заваёўваць іншыя рынкі», – кажа Марына Гірын у размове з «Белсатам».
Менавіта таму, адзначае Марына Гірын, ABBA наладзіла шчыльны кантакт з Гандлёва-прамысловаю палатаю Польшчы і з Дэпартаментам гандлю ЗША. З такімі партнёрамі лягчэй выходзіць на лакальныя рынкі той ці іншай краіны.
«Безумоўна, хочацца, каб гэта адбывалася хутчэй. Але гэта шлях і працэс. Мы расцём, нас будзе яшчэ больш, і мы будзем гаварыць ад імя большай колькасці беларускага бізнесу. А значыцца, у вачах партнёраў з Польшчы Літвы ці ЗША мы будзем выглядаць моцнымі», – запэўніла Марына Гірын.
З трыбуны форуму неаднойчы гучала сцверджанне, што беларускі бізнес – гэта бізнес еўрапейскі. І ў гэтым яго сіла.
Ці знойдзе нам кліентаў штучны інтэлект
На першай панэлі ўдзельнікі форуму абмеркавалі, як знайсці грошы на бізнес праз банкі, рынкі акцыяў, краўдфандынг, гранты і гарантыйныя фонды. Карыснымі парадамі і заўвагамі дзяліліся віцэ-прэзідэнт асацыяцыі ABBA Серж Наўродскі, заснавальнік кампаніі «Enji.io» Віктар Белякоў, адмыслоўца ў інкубацыі «TransferHUB» фонду сацыяльных і эканамічных ініцыятываў (FISE) Вераніка Ходач, сузаснавальнік і генеральны дырэктар «VC Leaders» Павел Міхальскі, кіроўная партнёрка кампаніі «SMOK Ventures» Дыяна Козярска.
Другая панэль канферэнцыі была прысвечаная штучнаму інтэлекту і сацыяльным сеткам у маркетынгу. Як пры дапамозе сучасных тэхналогіяў шукаць новых кліентаў, павялічваць продажы і аптымізаваць выдаткі, апавядалі генеральная дырэктарка кампаніі «Silna Marka» Анжаліка Чымкоўска, італьянская бізнесоўка Рабэрта Чанэцці (Roberta Cianetti), гендырэктар амрыканскай кампаніі «Cody Solutions» Максім Гонтар, эксперт у лічбавай трансфармацыі Аляксандр Сорг і кансультатнт наконт ШІ Кірыл Вярбіцкі.
Хто перамог у «Free Belarus Business Awards»
У межах форуму адбылося трэцяе ўзнагароджанне прэміяй «Бізнес вольнай Беларусі». Сёлета ўзнагароды (у грашовым вымярэнні – 5 тысяч еўраў) уручаліся не ў сямі (як летась), а ў трох намінацыях.
Сябра аргкамітэту Яраслаў Кот сцвердзіў падчас урачыстасці, што лаўрэаты «Free Belarus Business Awards» могуць лічыць сябе пераможцамі сапраўднага міжнароднага конкурсу, бо сталіся выбраннікамі вельмі аўтарытэтнага міжнароднага журы. У яго склад уваходзілі, напрыклад, знаны дызайнер гульняў Дэйвід Мюліх, прафесар Дэйвід Грынспан і гендырэктарка «ResFuturo» Юстына Арлоўска.
Пераможцамі сталіся:
«GlaBus» – у намінацыі «Eco Business». Кампанія «GlaBus» працуе над стварэннем экалагічна чыстых матэрыялаў для дарожнага будаўніцтва, выкарыстанне якіх змяншае выкіды вуглякіслага газу ў атмасферу. Пры стварэнні максімальна выкарыстоўвае перапрацаваныя матэрыялы.
«Alika. Mosaic» – у намінацыі «Art business». Каманда стварае ўнікальныя творчыя наборы, што дазваляюць кожнаму зрабіць свой уласны мазаічны твор.
«LYN cosmetics» – у намінацыі «Business Lady». Брэнд натуральнай касметыкі «робіць акцэнт на бяспецы для чалавека і навакольнага асяроддзя».
Атрымліваючы статуэтку, заснавальніца кампаніі «LYN cosmetics» Алена Карчэўская прызналася, што не перамагла б, каб не падтрыманне мужа, з якім разам стваралі касметычную фірму.
«Мы да апошняга не ведалі, што пераможам, і спадзяваліся, што возьмем намінацыю менавіта ў «Экабізнесе». Вельмі разнерваваліся, калі яна прайшла міма нас. Але ў выніку вельмі ўсцешаныя. Бо мы ўжо трэці раз запар падавалі заяўку на гэты конкурс. Нарэшце – перамога! На наступным этапе паспрабуем стаць «Прарывам года», – ужо пасля цырымоніі распавяла «Белсату» Алена Карчэўская.
«Такая мара – каб праект стаўся нацыянальным»
Наступны этап, а дакладней – чацвёрты конкурс «Free Belarus Business Awards», адбудзецца, як паабяцалі арганізатары, у канцы 2024 года. Сёлетняя цырымонія адбылася дзякуючы падтрыманню Еўразвязу.
«Такая мая мара – каб гэты праект існаваў і далей. Каб ён стаўся сапраўдным нацыянальным праектам», – сказала падчас цырымоніі абвяшчэння пераможцаў конкурсу яго арганізатарка і віцэ-прэзідэнтка ABBA Марына Гірын.
Але так можа стацца, калі да супрацы ў арганізацыі конкурсу «Free Belarus Business Awards» далучацца беларускія бізнесоўцы – зробяцца яго спонсарамі і будуць фармаваць прызавы фонд. Марына Гірын запрасіла беларусаў да супрацы.
Зміцер Міраш belsat.eu
