У Вільні адбыўся суд над Мантасам Даніелюсам, яго асудзілі на 9 гадоў пазбаўлення волі за шпіянаж на карысць лукашэнкаўскіх спецслужбаў.
20 верасня на судовым пасяджэнні ў Віленскім акруговым судзе Мантасу Даніелюсу, які з 2022 года збіраў звесткі пра беларускіх актывістаў, што пражываюць у Літве, і перадаваў іх прапагандыстцы Ксеніі Лебедзевай, прысудзілі пакаранне ў выглядзе 9 гадоў пазбаўлення волі. Пра гэта паведамляе радыё «Свабода».
Даніелюс быў затрыманы ў верасні 2022 года, калі спрабаваў уцячы ў Беларусь.
Акрамя шпіянажу, яго прызналі вінаватым у пагрозах сведкам – ён, калі быў на волі да суда, напісаў аднаму з іх пагрозлівае паведамленне, пасля чаго зноў быў узяты пад варту.
Следства ўстанавіла, што прапагандыстка з Беларусі Ксенія Лебедзева давала Мантасу Даніелюсу канкрэтныя ўказанні наконт таго, якую інфармацыю збіраць. Найбольш яе цікавілі беларускія арганізацыі, што дзейнічаюць у Літве, людзі, якія ўцяклі з Беларусі ад рэпрэсіяў, а таксама тыя, хто дапамагаў ім эвакуявацца. Акрамя гэтага, яна запатрабавала звесткі пра вучэнні палка Каліноўскага, яго ўзбраенне і ланцугі паставак. Даніелюс, атрымаўшы давер ад беларускіх арганізацыяў, прапаноўваў ім юрыдычную дапамогу, але ягоныя частыя пытанні выклікалі падазрэнні.
Падчас свайго апошняга слова Даніелюс прасіў суд апраўдаць яго і звярнуў увагу на тое, што некаторыя сведкі, на ягоную думку, давалі непраўдзівыя паказанні. Ён адмаўляў пагрозы на адрас сведкі, заяўляючы, што ўсяго толькі выказваў незадаволенасць пазіцыяй беларускіх актывістаў. Пракурор жа настойваў на пакаранні ў выглядзе 11 гадоў пазбаўлення волі. Хоць суд адбываўся за замкнёнымі дзвярыма, прысуд быў абвешчаны публічна.
Раман Шавель belsat.eu
