Аляксандр Чарнуха анансаваў новую кнігу «Гвалт». На выданне кнігі трэба 6700 еўра – аўтар збірае грошы і прымае перадзамовы на сайце «Gronka». Чарнуха расказаў «Белсату», што кніга выходзіць вельмі асабістай, падчас напісання ён сам плакаў.
Музычны журналіст, аўтар каналу «Міністэрства сепультуры» Аляксандр Чарнуха дэбютаваў як пісьменнік у 2022 годзе з кнігай «Свінні» – сатырай на беларускае правінцыйнае жыццё з алюзіямі на падзеі 2020 года. Аўтар кажа «Белсату», кніга разышлася лепш, чым ён думаў: цалкам разышоўся арыгінальны наклад па-расейску (яго дадрукоўваць пакуль не плануе), ужо надрукаваны і прадаецца трэці наклад беларускай версіі, ёсць таксама электронная версія.
З папярэдняй кнігай «усё добра ідзе», запэўнівае Чарнуха. Яна не прынесла аўтару стратаў нават з улікам таго, што для кнігі ладзілі два прома-туры па розных краінах. Першы прома-тур з кнігай па-расейску ён рабіў за свае грошы, «выйшаў у нуль». Другі прома-тур з кнігай па-беларуску быў з дапамогай трэвэл-гранту праграмы «ArtPower Belarus», ездзілі часам разам з перакладчыкам Алесем Плоткам. Збіралі поўныя залі нават там, дзе не чакалі.
Пра што будзе «Гвалт»
Наступная кніга гатовая напалову, расказвае Чарнуха. Цяпер ён працуе над другой часткай, хай і не так спешна, як хацелася б. Аўтар упэўнены, што ў хуткім часе даробіць кнігу, бо ўсе «канцэптуальныя рашэнні» ўжо ёсць, засталося толькі сесці і ператварыць ідэі і нататкі ў гатовыя апавяданні.
Новую кнігу ён анансуе як складанку з дзесяці апавяданняў, «мікс гіперрэалізму і беларускай містыкі», і кажа, што «не ставіць дыягназы, а фармулюе пытанне і тым самым заклікае чытача да якаснай рэфлексіі».
,,«Гэта розныя абсалютна пытанні, але тым ці ішным чынам звязаныя менавіта з тэмай гвалту, – расказвае Чарнуха. – Гвалту не абавязкова фізічнага, але і псіхалагічнага гвалту.
Таму што я ўпэўнены, што мы ўсе ахвяры і гвалтаўнікі адначасова. І часам баімся адказаць сабе самім на вельмі нязручныя, балючыя пытанні. Я хачу, каб гэтая кніга прымусіла нас задаць іх сабе, пакалупацца ў сабе і адказаць на іх.
Так, яна будзе нясмешная, часам балючая. Балючая яна і для мяне, бо там вельмі шмат асабістага. Некаторыя рэчы я пісаў са слязьмі на вачах, бо гэта складаныя для мяне тэмы, складаныя для мяне сюжэты».
Ці можна рэкамендаваць гэта тым, каму спадабаліся «Свінні»? Чарнуха адказвае: гэта ўсё яшчэ ягоная кніга, а тым, каму «Свінні» спадабаліся, «Гвалт» можа спадабацца не як працяг «Свінняў», а як працяг ягонай бібліяграфіі. «Гвалт» будзе мець адно «пераходнае апавяданне» – «Рука», якое ўжо можна пачытаць. У ім «скончылася Груздзеўшчына, пачаліся іншыя сюжэты».
Як замовіць кнігу
Пакуль – на платформе «Gronka». Там можна проста ахвяраваць аўтару 10 еўра і атрымаць згадку ў спісе фундатараў. За 25 еўра можна атрымаць кнігу з аўтографам аўтара. За большыя сумы – кнігу і відэакаментар аўтара пра цікавыя факты аб апавяданнях і цішотку з ілюстрацыяй да кнігі, нават ранні доступ да выпускаў «Міністэрства сепультуры» і штомесячны плэйліст ад аўтара.
Агулам на кнігу Чарнуха хоча сабраць 6700 еўра. Столькі трэба на шыхтаванне і друк 1000 асобнікаў, працу рэдактара і карэктара, а таксама ілюстратаркі – ягонай жонкі Таісіі Чарнухі, якая малявала вокладкі для «Свінняў». Да канца збору застаецца 15 дзён, на момант падрыхтоўкі матэрыялу набраўся 41 % патрэбнай сумы.
Пазней кніга мае выйсці ў выдавецтве «Янушкевіч».
Алесь Наваборскі, «Белсат»
