На ініцыятыву Менскай пракуратуры прызнаныя нядзейнымі шэраг даверанасцяў асобаў, якія афармлялі іх дыстанцыйна, за «парушэнне правілаў здзяйснення натарыяльных дзеянняў». Пра гэта паведамляе прэс-служба Генеральнай пракуратуры.
Пракуратура Менску падала ў суды пазовы супраць шэрагу беларусаў, каб усталяваць «факты бязвартасці» даверанасцяў.
«У пракуратуры ўстанавілі, што натарыус Менскай гарадской натарыяльнай акругі засведчыў даверанасці, выдадзеныя ад імя шэрагу грамадзянаў, якія на момант здзяйснення натарыяльных дзеянняў, не былі на тэрыторыі Рэспублікі Беларусь і сваіх подпісаў не пакідалі», – піша Генпракуратура.
Ведамства сцвярджае, што даверанасці былі засведчаныя з парушэннем правілаў, і спасылаецца на Закон аб натарыяце і натарыяльнай дзейнасці ды Інструкцыю аб парадку здзяйснення натарыяльных дзеянняў за 23 кастрычніка 2006 года № 63. Нібыта даверанасці былі зацверджаныя без высвятлення асобы давернікаў, іхнай дзеяздольнасці і волевыяўлення.
«Рашэннямі судоў пазоўныя патрабаванні пракуратуры Менску аб устанаўленні фактаў бязвартасці даверанасцяў задаволеныя», – піша Генпракуратура.
Пакуль рашэнні судоў не ўступілі ў моц і могуць быць абскарджаныя альбо апратэставаныя.
Арсен Рудэнка belsat.eu
