За содні істотна скараціліся чэргі на выезд з Беларусі ў Літву. Акрамя таго, крыху зменшылася чарга і ў Берасці, але Памежная ахова Польшчы паабяцала пры патрэбе накіраваць у Тэрэспаль дадатковых афіцэраў, каб паскорыць кантроль.
Паводле звестак Дзяржаўнага памежнага камітэту Беларусі на 18:00, у чарзе ў Берасці цяпер 480 легкавікоў. Напярэдадні ў гэты ж час было 570.
Як пішуць у Telegram-чатах, цяпер на мінанне мяжы выдаткоўваюць 28 гадзінаў жыцця.
У Тэрэспалі ў бок Беларусі — 80 аўтаў, патрабуецца каля 6 гадзінаў чакання.
Аўтобусаў перад «Варшаўскім мостам» — 35, пакутаваць даводзіцца 15 гадзінаў. На тым баку аўтобуснай чаргі няма.
Тым часам у Памежнай ахове Польшчы паабяцалі павялічыць лік афіцэраў у Тэрэспалі, калі падарожнікі паедуць у ЕЗ праз Берасце замест пунктаў пропуску на беларуска-літоўскай мяжы.
«Калі ўзнікне неабходнасць, будуць накіраваныя дадатковыя афіцэры, каб зарэгістраваць болей падарожнікаў на аўтамабільным памежным пераходзе “Тэрэспаль”», — сказаў «Белсату» прадстаўнік Надбужанскага аддзелу памежнай службы Дар'юш Сеніцкі.
Адначасова ён падкрэсліў, што час чакання залежыць не толькі ад памежнікаў:
,,«Мы не адзіная служба, якая правярае падарожнікаў. Кожны падарожнік, акрамя памежнага кантролю, праходзіць таксама мытны кантроль. Варта адзначыць, што час чакання таксама моцна залежыць ад тэмпаў і рэгулярнасці працы памежных і мытных службаў Беларусі».
«Белсат» спытаў у Мытнай службы Польшчы, ці плануецца павялічыць колькасць афіцэраў дзеля паскарэння пропуску людзей, аднак адказу на свой запыт пакуль не атрымаў.
Калапс у адзіным пункце пропуску на беларуска-польскай мяжы чакаўся ў звязку з пастановаю Літвы не пускаць аўтамабілі, зарэгістраваныя ў Беларусі. Правіла мелася набыць моц 16 жніўня, аднак улады рэспублікі пайшлі на саступкі. Цяпер у Літву можна заехаць на легкавіку з беларускімі нумарамі, які належыць фізічнай асобе, выкарыстоўваецца толькі ў асабістых мэтах і ўвозіцца не для продажу. За стырном мае быць уласнік. Грамадзяніну Беларусі пры гэтым патрабуецца віза, выдадзеная Літвою, або часовы ці сталы дазвол на жыхарства ў Літве.
У «Каменным Лозе» цяпер 80 легкавікоў (напярэдадні ў гэты час было 130, а максімум за мінулыя содні — 230), чакаюць каля 14 гадзінаў. Дадому — хутчэй: у чарзе 25 аўтаў.
У «Беняконях» — 50 аўтамабіляў (у пятніцу ў гэты ж час было ўдвая болей). Тыя, хто зараз мінаюць там мяжу, прачакалі 18 гадзінаў. У бок Беларусі — толькі 15 машынаў.
Аўтобусных чэргаў на мяжы з Літвою няма, хаця з «Каменнага Логу» пасажыры перадаюць, што не менш за 5 аўтобусаў захраслі перад беларускім кантролем на ўезд у нашую краіну: мытнікі доўга спраўджваюць багаж, а потым з допытаў даводзіцца чакаць грамадзянаў Украіны.
У «Грыгароўшчыне» выезду ў Латвію чакаюць 70 аўтаў (содні таму было 60), падарожнікі сведчаць, што на пераход патрабуецца каля 7—8 гадзінаў. У бок Беларусі чаргі там няма.
Дар’я Форман, Сцяпан Кубік, «Белсат»
