У Нацыянальным аэрапорце «Менск» 13 верасня памежнікі затрымалі дзяўчыну з замежным пашпартам Конга. Яна прыляцела са Стамбулу і планавала вучыцца ў Беларусі, аднак ейны пашпарт выклікаў падазрэнні, паведамляе Дзяржпамежкамітэт Беларусі.
«Пасля спецыяльнага правярання было ўстаноўлена, што дакумент часткова падроблены – на старонцы з вызначальнымі звесткамі зменены год нараджэння з 1995 на 2001», – піша Дзяржпамежкамітэт.
Як высветлілася, дзяўчына накіроўвалася ў Беларусь, каб паступіць у вышэйшую навучальную ўстанову.
«На гэты момант яна затрыманая і змешчаная ў ізалятар часовага ўтрымання ГУУС Менгарвыканкаму да высвятлення асобы. За спробу незаконнага мінання мяжы іншаземцы пагражае штраф да 100 базавых велічынь», – працягвае Дзяржпамежкамітэт.
Памежнікі нагадваюць, што за выкарыстанне падробленых дакументаў прадугледжаная крымінальная адказнасць – абмежаванне волі на тэрмін да двух гадоў.
Арсен Рудэнка belsat.eu
