Неймаверная колькасць ападкаў, якія прынёс з сабою шторм Барыс, справакавала моцную паводку. У выніку шмат якія гарады Цэнтральнай і Усходняй Еўропы зазналі моцныя разбурэнні і чалавечыя ахвяры. Што вядома на гэты момант.
Найбольш пацярпелі ад паводкі частка Аўстрыі, Польшчы, Чэхіі, Румыніі. Чакаецца таксама, што на гэтым тыдні стыхія можа закрануць Славаччыну і Вугоршчыну.
Паводле апошніх звестак, загінулі як мінімум 23 чалавекі: сямёра – у Румыніі, дзясяцера – у Польшчы, пяцёра – у Чэхіі і адзін – у Аўстрыі.
У Румыніі таксама паведамляюць, што ў двух найбольш пацярпелых раёнах загінулі прынамсі 6200 птушак і 3000 хатніх жывёлінаў, а ветэрынары ў пацярпелых раёнах праводзяць дэзынфекцыйныя захады.
У Чэхіі паведамляюць пра эвакуацыю 12 тысячаў чалавек у раёны, не закранутыя паводкаю. Чэшскія ўлады абвесцілі надзвычайнае становішча ў двух паўночна-ўсходніх раёнах краіны.
Прэм'ер-міністр Польшчы Дональд Туск у панядзелак правёў экстраную нараду і абвесціў стан стыхійнага бедства ў затопленых раёнах, а таксама заявіў, што ўрад выплаціць 1 мільярд злотых у якасці неадкладных выплатаў асобам, пацярпелым ад бедства.
17 верасня зону стыхійнага бедства пашырылі на Люблін, Дзержонюў, Сьвідніцу, Аполе, Крапкавіцэ, Бжэг і Кэндзежын-Козьле. Такі стан у прыватнасці накладае пэўныя абмежаванні на правы і свабоды асобаў, напрыклад, на перабыванне ў пэўных месцах, і прадугледжвае прымусовую эвакуацыю.
Наймацнейшая паводка назіралася ў Сілезскім і Ніжнесілезскім ваяводствах, што на поўдні і паўднёвым захадзе краіны: яе справакаваў выхад ракі Нысы (гэта левы прыток Одэру) са свайго рэчышча. Вядома, што ў краіне прарвала дзве дамбы: недалёка ад Пачкава і на рацэ Мараўцы, у выніку чаго Строне-Сьлёнске ў Ніжнесілезскім ваяводстве затапіла вадою.
Эксперты папярэджваюць пра пагрозу паводкі ў вяршынях ракі Одэр у польскім горадзе Аполе (насельніцтвам 130 тысячаў) і Вроцлаве (640 тысячаў жыхароў). Мясцовыя ўлады Вроцлава загадалі ужываць мяшкі з пяском, каб узняць узровень узбярэжжаў і абараніць жылыя раёны ад верагоднага затаплення ракою Быстрыца: выкарыстаюць 1100 тонаў пяску.
Мэр вугорскай сталіцы – Будапэшту – таксама папярэдзіў жыхароў пра імавернасць вялікай паводкі, якая можа стацца найбольшаю за апошняе дзесяцігоддзе. Паведамляецца, што прэм’ер-міністр краіны Віктар Орбан адмяніў запланаваныя замежныя візіты, у тым ліку выступ на пленарнай сесіі Еўрапейскага парламенту, якое мусіць адбыцца ў сераду, дзе чакаюцца дэбаты наконт ягоных паводзінаў пасля таго, як Вугоршчына прыняла на сябе старшыняванне ў Еўразвязе, паведамляе «Associated press».
Раман Шавель belsat.eu
