Краіны Цэнтральнай і Усходняй Еўропы змагаюцца з катастрафічнымі паводкамі. Наступствы шторму Барыс у фотаздымках

16.09.2024, 17:54

Жанчыны абдымаюць адна адну пасля эвакуацыі з затопленых дамоў у Есэніку (Jesenik), Чэхія. 15 верасня 2024 года. Фота: Lukas Kabon / Anadolu Press / Abaca Press / East News

podpis źródła zdjęcia

За апошнія дні праз шторм ‎Барыс моцныя ападкі абрынуліся на Румынію, Чэхію, Польшчу, Славакію, Вугоршчыну, паўднёвую Нямеччыну і некаторыя раёны Аўстрыі. У найбольш пацярпелых ад вады рэгіёнах адбываецца эвакуацыя насельніцтва, аварыйныя службы ўмацоўваюць ахоўныя збудаванні. Па стане на вечар 16 верасня вядома мінімум пра 17 ахвяраў, тысячы людзей былі вымушаныя пакінуць свае дамы.

У Чэхіі моцныя дажджы закранулі поўнач краіны, дзе больш за 50 000 дамоў засталіся без электрычнасці. Улады паведамілі пра адну ахвяру, восем чалавек лічацца зніклымі без звестак. Нягледзячы на тое, што ўзроўні вады ў верхніх частках рэк зніжаюцца, паводка працягвае рухацца ўніз па цячэнні, пагражаючы ніжнім раёнам краіны.

Чалавек прабіраецца па затопленай вуліцы пасля моцнага дажджу ў Есэніку, Чэхія. 15 верасня 2024 года. Фота: David W Cerny / Reuters / Forum

Выгляд з паветра на паводкавыя воды ў Глухалазах (Glucholazy) на поўдні Польшчы. 15 верасня 2024 года. Фота: Sergei Gapon / AFP / East News

Ратаўнік трымае ката, выратаванага з затопленага даму ў горадзе Есэнік, Чэхія. 15 верасня 2024 года. Фота: Lukas Kabon / Anadolu Press / Abaca Press / East News

У Аўстрыі 24 вёскі ў Ніжняй Аўстрыі абвешчаны «‎зонамі катастрофы», колькасць ахвяр павялічылася да трох. Ва ўсходняй частцы краіны спынены чыгуначныя зносіны, а некалькі ліній метро ў Вене зачынены з-за пагрозы перапаўнення ракі Вена.

Затоплены раён пасля паводкі ў мястэчку Лянгенлёйс (Langenlois), Аўстрыя. 15 верасня 2024 года. Фота: Lisa Leutner / Reuters / Forum

Салдаты нясуць мяшкі з пяском для ўмацавання плаціны ўздоўж ракі Дунай у вёсцы Пілішмарат (Pilismarot), Вугоршчына. 16 верасня 2024 года. Фота: Marton Monus / Reuters / Forum

Супрацоўнікі камунальных службаў працуюць над ліквідацыяй пашкоджанняў дамоў і вуліц пасля паводкі ў горадзе Есэнік, Чэхія. 15 верасня 2024 года. Фота: Lukas Kabon / Anadolu Press / Abaca Press / East News

На ўсходзе Румыніі, у Галацкім павеце, які найбольш пацярпеў ад стыхіі, моцныя дажджы пакінулі па меншай меры 25 000 чалавек без электрычнасці. Дэпартамент па надзвычайных сітуацыях краіны пацвердзіў знаходжанне шасці целаў, у тым ліку трох пажылых жанчын і аднаго мужчыны за апошнія два дні.

Мужчына трымае сабаку падчас эвакуацыі з затопленай вуліцы ў Есэніку, Чэхія. 15 верасня 2024 года. Фота: David W Cerny / Reuters / Forum

След ад вады бачны на сцяне пасля паводкі ў Клодзку (Kłodzko), Польшча. 15 верасня 2024 года. Фота: Wojciech Koziol / Forum

Румынскія вайскоўцы рыхтуюцца да перадачы вады жыхарам, пацярпелым ад паводкі, у Куза-Водэ (Cuza Vodă), Румынія. 15 верасня 2024 года. Фота: Andreea Campeanu / Reuters / Forum

У польскім горадзе Клодзка эвакуявана каля 1 600 чалавек, патануў адзін чалавек, што павялічыла колькасць ахвяраў у краіне да пяці. Найбольш моцна ад стыхіі пацярпелі Ніжнесілезскае, Апольскае, Сілезскае і Малапольскае ваяводствы.