11 верасня грамадзянін Латвіі Эмілс Асарс адправіўся ў Беларусь на аўтамабілі і знік. Магчыма, ён затрыманы, паведамляе «Reform.news» са спасылкай на знаёмых мужчыны.
Паводле інфармацыі ад сваякоў, ён выправіўся ў дарогу раніцаю 11 верасня. Эмілс Асарс кіраваў аўтамабілем «Chrysler» і меўся адвезці знаёмую жанчыну ў Верхнядзвінск. Ён планаваў уехаць у Беларусь праз памежны пункт «Патэрніекі – Грыгораўшчына» каля 10:00.
12 верасня на тэлефон сваякоў паступіў званок з беларускага нумара, у якім сцвярджалася, што Асарса затрымала міліцыя.
Звязацца з гэтым нумарам паўторна не ўдалося, а афіцыйнай інфармацыі ад беларускіх памежнікаў не паступала. Тэлефон самога Эмілса Асарса з моманту знікнення застаецца адключаны.
Латышская паліцыя праінфармаваная і занялася пошукамі.
Раней амбасадар Латвіі ў Беларусі Эйнарс Сэманыс адзначаў, што грамадзянам Латвіі небяспечна ездзіць у Беларусь, бо ім можа пагражаць затрыманне або суд.
Такую ж рэкамендацыю дае сваім грамадзянам урад Літвы.
«У нас ёсць інфармацыя пра некалькі літоўскіх грамадзянаў, якія затрыманыя і / або адбываюць пакаранне ў Беларусі. У нас няма падставаў меркаваць, што абвінавачанні беларускіх уладаў на адрас грамадзянаў Літвы абгрунтаваныя», – паведамляла МЗС Літвы.
Арсен Рудэнка belsat.eu
