13 жніўня ў адной са сталічных кватэр АМАП з выкарыстаннем зброі затрымліваў мужчыну, падазраванага ў забойстве. Мужчына пачаў адстрэльвацца і ў выніку быў забіты.
Затрымліваць падазраванага ў забойстве мужчыну ў адной з менскіх кватэр прыехалі супрацоўнікі крымінальнага вышуку ГУУС і АМАП.
Падчас затрымання мужчына аказаў супраціўленне і стаў страляць у сілавікоў з пісталета. Група захопу адкрыла агонь у адказ. У выніку падазраваны быў паранены і дастаўлены ў медычную ўстанову, дзе пазней і памёр ад атрыманых раненняў.
Ім аказаўся 33-гадовы беларус Аляксандр Ліпскі, які, як меркавала следства, у 2021 годзе здзейсніў забойства ў доме па праспекце Ракасоўскага ў Менску. Тады, узброены пісталетам, ён уварваўся ў кватэру і стрэлам забіў 33-гадовую жанчыну. Пазней ён спрабаваў забіць і ейнага мужа, але той паспеў скочыць з пятага паверху дома.
Пасля забойства Аляксандру Ліпскаму ўдалося схавацца. Разам са сваёй маці ён быў абвешчаны ў вышук. Праз тры гады супрацоўнікам МУС удалося вызначыць адрас пражывання падазраванага.
Раман Шавель, «Белсат»
