За галоўнымі падзеямі, што ўплываюць на жыццё беларусаў ці выклікаюць шырокі рэзананс у грамадстве, разам з «Белсатам» сочыць мастак Дэ Лёс.
Пакуль не YouTube
Праект Видео.бел, які ўлады пазіцыянавалі як «першы крок да стварэння беларускага YouTube», запусціўся 12 верасня. Першае знаёмства з імі навяло на думкі, што ён не беларускі і зусім не YouTube.
Галоўнае тэхнічнае адрозненне ў тым, што на ім няма магчымасці запампоўваць відэа ад карыстальнікаў, можна толькі глядзець. Дый выбар таго, што можна паглядзець, невялікі: на сайце сабраныя сюжэты дзяржаўных тэлеканалаў «Беларусь 1», ОНТ, СТВ, «РТР-Беларусь» і «Мір», а таксама выданняў БелТА і «СБ. Беларусь сегодня». Падобна, відэаролікі проста дублююцца з іхных YouTube-каналаў.
Імаверна, улады рыхтуюцца да магчымага блакавання сапраўднага YouTube, хаця міністр інфармацыі Марат Маркаў паабяцаў, што гаворкі пра намер забараніць YouTube» не ідзе, бо пакуль яшчэ «не адчулі пагрозы».
Што да беларускасці праекту, то адмыслоўцы бачаць там расейскі след – мяркуючы з коду на сайце, для прайгравання відэа выкарыстоўваецца расейскі «SPB TV Player» – распрацоўка расейскай прыватнай кампаніі «SPB TV», якая называе сярод сваіх кліентаў і «Voka», і расейскі «Первый канал», і праекты ў іншых краінах, аж да Кітаю і Камбоджы.
Чырвонае святло для беларускіх аўтаў
Сейм Латвіі 12 верасня канчаткова зацвердзіў пастанову, згодна з якой аўтамабілі на беларускіх нумарах да 31 кастрычніка павінны быць вывезеныя з Латвіі або зарэгістраваныя на тэрыторыі краіны.
Пасля гэтага тэрміну ўладальнікі транспарту з Беларусі змогуць уязджаць у Латвію толькі для аднаразовага транзіту, папярэдне аформіўшы заяўку праз электронныя сэрвісы Дэпартаменту бяспекі дарожнага руху Латвіі.
Уезд дазволяць таксама транспарту для дыпламатычных і консульскіх службаў, гуманітарных місіяў. Асобы з абмежаванымі магчымасцямі, якія кіруюць адмыслова абсталяваным транспартам, змогуць запытаць у Службы фінансавай выведкі Латвіі дазвол на ўезд для наведвання родных. Служба фінансавай выведкі таксама зможа выдаваць дазвол на ўезд на запыт міністра замежных справаў у асобных выпадках (калі ўезд звязаны з дзяржаўнымі інтарэсамі) на тэрмін да трох месяцаў.
Дарэчы, Літва і Эстонія таксама забаранілі ўезд на сваю тэрыторыю легкавых аўтамабіляў з беларускімі нумарамі. У той жа час Польшча не ўводзіла такой забароны, бо не хоча, каб санкцыі, што мусяць абмежаваць рэжым, закранулі звычайных грамадзянаў. На думку літоўскіх уладаў, забарона не б’е па беларускіх грамадзянах.
Сэканды – чарговы боль беларусаў
Да ўступлення ў сілу забароны ЕЗ на экспарт у Беларусь адзення сэканд-хэнд засталося пару тыдняў – яна набудзе моц 1 кастрычніка. Улады не хаваюць свайго задавальнення, бо даўно бачаць у гэтых крамах сур’ёзнага канкурэнта. У 2021 годзе ўрад забараніў гандляваць у сэканд-хэндах новым адзеннем, але гэта не паўплывала на іх папулярнасць.
Асабліва адчувальным знікненне сэкандаў будзе ў глыбінцы, кажуць чытачы «Белсату». Там гэтыя крамы – адзіны спосаб адносна нядорага купіць якасную і брэндавую адзежу, да якой у вялікіх гарадах яшчэ застаўся сякі-такі доступ.
Маштабнасць праблемы пацвярджае і статыстыка. Паводле ацэнкі Белстату, прыкладна 35 % набытага ў Беларусі адзення складае ўжыванае. Гандлююць ім амаль у 3000 пунктаў, уключаючы інтэрнэт-крамы. Аб'ём увозу сэканд-хэнду на год ацэньваўся як 60–80 млн долараў, а выручка на ўнутраным рынку склала аж 70 млн долараў.
Мяжа Беларусі з ЕЗ застаецца «гарачай кропкай»
Польскі МУС узгадніў праект, паводле якога буферная зона на мяжы з Беларуссю будзе захоўвацца яшчэ тры месяцы. Яна прыносіць сваю карысць, а яе негатыўны сацыяльна-эканамічны ўплыў невялікі, патлумачыў гэтае рашэнне намеснік кіраўніка Міністэрства ўнутраных справаў і адміністравання Польшчы Чэслаў Мрочэк.
Нагадаем, што буферная зона на польска-беларускай мяжы пачала існаваць 13 чэрвеня 2024 года. Яе ўвялі неўзабаве пасля ранення польскага памежніка адным з мігрантаў. Перабываць у гэтай зоне забаронена.
Дарэчы, Латвія таксама падоўжыла рэжым узмоцненага памежнага кантролю на мяжы з Беларуссю – да 31 снежня 2024 года.
Гараць балоты
На гэтым тыдні ў Беларусі здарыўся вялікі пажар – гарэлі Альманскія балоты. Гэта тэрыторыя рэспубліканскага заказніку. Плошча пажару дасягала 70 гектараў. Пажар быў бачны нават з космасу: на спадарожнікавым здымку NASA можна прыкмеціць, што гарыць тэрыторыя паўночна-заходняй часткі заказніку.
Для тушэння пажару выкарысталі авіяцыю – у прыватнасці, верталёты МНС Мі-8 і Мі-17. Усяго ў змаганні з агнём удзельнічалі 29 адзінак тэхнікі і 128 чалавек.
Дэ Лёс belsat.eu
