Нацбанк пахваліўся дадатным сальда вонкавага гандлю: у студзені – чэрвені прафіцыт склаў $ 100 млн. Дагэтуль тры месяцы запар Беларусь праядала валюту.
У першым паўгоддзі 2024 года экспарт тавараў і паслугаў вырас год да года на 3,7 %, а імпарт – на 2,6 %, падлічыў Нацбанк.
Вонкавы гандаль Беларусі традыцыйна ратуюць паслугі. Іх экспарт павялічыўся на 2,8 %, а імпарт упаў на 4,9 % у параўнанні з студзенем – чэрвенем летась. Сальда – $ 1,6 млрд.
Калі б не паслугі, вынік быў бы зусім жаласным, бо сальда гандлю таварамі, паводле рэгулятара, склала мінус $ 1,5 млрд. Іх і экспарт, і імпарт вырас амаль аднолькава: на 3,9 % і 3,8 % адпаведна.
У Белстату, які часткова раскрывае вонкавы гандаль толькі таварамі, уласныя падлікі, і яны адрозніваюцца ад звестак Нацбанку. Паводле статыстычнага ведамства, у першым паўгоддзі экспарт тавараў вырас на 4,2 % год да года, імпарт – на 3,5 %.
Найбольш заўважныя змены адбыліся ў імпарце з краінаў СНД (тут галоўную ролю адыгрывае Расея), які павялічыўся ажно на 13 %, і ў экспарце ў краіны па-за СНД: плюс 10 % год да года.
Пастаўкі ў дзяржавы былога Савецкага саюзу выраслі на 2 %, а імпарт з астатніх краінаў свету скараціўся на 8 %.
Паводле Белстату, адмоўнае сальда гандлю таварамі вышэйшае, чымся падлічыў Нацбанк: $ 1,7 млрд.
Дагэтуль Нацбанк тры месяцы запар справаздачыўся пра дэфіцыт вонкавага гандлю. У студзені – сакавіку адмоўнае сальда было $ 87 млн, у студзені – красавіку – $ 458 млн, у студзені – траўні – $ 142 млн.
Цяперашнія ўлады старанна хаваюць усе падрабязныя звесткі пра тое, з якімі краінамі і чым гандлюе Беларусь, таму пэўна растлумачыць змены ў гэтых паказніках немагчыма.
Сцяпан Кубік, «Белсат»
