26 ліпеня ў Менскім гарадскім судзе ў закрытым рэжыме пачаўся судовы працэс па справе аб падрыхтоўцы тэракту на Дзень Перамогі. Пяць чалавек, у тым ліку 25-гадовы Валер Водзін, Андрэй Грыгор'еў, Вікторыя Волчак, Ганна Савачкіна і яе маці Таццяна Русак, абвінавачваюцца ў здрадзе дзяржаве і падрыхтоўцы тэракту. 9 жніўня стаў вядомы прысуд Валеру Водзіну. Пакаранні для астатніх пакуль невядомыя праваабаронцам.
Падрабязнасці па гэтай справе былі агучаныя ў прапагандысцкім фільме «Забойная пасылка смерці: хто і як хацеў здзейсніць тэракт у Дзень Перамогі», які быў паказаны па АНТ 15 траўня 2023 года. З фільма вынікала, што беларускі КДБ «перадухіліў» тэракт, які нібыта ладзіўся «пад куратарствам Кіева». Арганізатарам гэтай акцыі быў названы беларус Валер Водзін, які ў лютым 2023 года з’ехаў ва Украіну і далучыўся да беларускіх добраахвотнікаў — палка Каліноўскага.
Паводле аўтараў фільму, Водзін перасылаў у Беларусь настольныя электрапліты, якія прасіў схаваць сваіх знаёмых – тых затрымалі на пачатку траўня 2023 года. У электраплітах нібыта знаходзілася выбухоўка. З іх дапамогай і «планавалася здзейсніць тэракт на 9 траўня». У фільме таксама сцвярджалася, што заданне аб правядзенні тэракту Водзін атрымаў ад ГУР Мінабароны Украіны.
Усіх фігурантаў справы судзілі паводле шасці артыкулаў Крымінальнага кодэкса РБ, уключаючы здраду дзяржаве, падрыхтоўку тэракту, незаконныя дзеянні з агнястрэльнай зброяй, удзел у экстрэмісцкіх фармаваннях і незаконнае перамяшчэнне ўзбраення праз мяжу. Справа разглядалася ў закрытым рэжыме суддзёй Сяргеем Хрыпачом, вядомым жорсткімі прысудамі па палітычных справах.
Суд над Валерам Водзіным прайшоў у парадку спецвытворчасці. Яму прызначылі пазбаўленне волі тэрмінам у 20 гадоў у калоніі ўзмоцненага рэжыму і штрафам у памеры 600 базавых велічыняў (24 000 рублёў).
Раман Шавель, «Белсат»
