Гадавая інфляцыя ў жніўні – 6,1 %, гэта максімум сёлета, сведчаць звесткі Белстату.
У жніўні ў параўнанні з ліпенем, паводле статыстычнага ведамства, цэны ў Беларусі знізіліся на 0,1 %. За месяц фрукты і гародніна патаннелі на 6 % і 5 % адпаведна. Знізіліся таксама цэны на мыйныя сродкі і санаторна-курортныя паслугі – на 1 %.
Агулам за месяц харчы патаннелі на 0,3 %, а нехарчовыя тавары і паслугі падаражэлі адпаведна на 0,1 % і 0,2 %.
Пры гэтым калі параўноўваць з леташнім жніўнем, то цэны ў Беларусі выраслі на 6,1 %. Такой шпаркай гадавой інфляцыі сёлета яшчэ не было.
Харчы падаражэлі ў жніўні на 7,3 % год да года. У лідарах тут гародніна (плюс 22,5 %), тытунь і цыгарэты (25,2 %), фрукты і арэхі (10,3 %), спіртныя напоі (9 %).
Цэны на нехарчовыя тавары выраслі за год на 4,4 %. Лекі падаражэлі на 13 %, газеты і часопісы – на 11,6 %, бензін – на 3,5 %.
Паслугі сталі даражэйшымі на 6 %. Пры гэтым, напрыклад, збор побытавых адкідаў вырас у цане на 18,6 %, рамонт абутку – на 15 %, пасажырскія аўтаперавозы – на 11,6 %, бягучае ўтрыманне і рамонт жылых памяшканняў – на 11,4 %.
Зрэшты, эканамістка даследчага цэнтру BEROC Настасся Лузгіна адмовілася лічыць такі рост цэнаў катастрафічным. У каментары «Белсату» яна сказала, што тут збольшага ўплывае сезонны чыннік:
«У гадавым вымярэнні паскарэнне нават вышэй за планавыя паказнікі, аднак варта паглядзець наступныя некалькі месяцаў, бо тут адыгрываюць ролю сезонныя чыннікі – як яны спрацавалі летась і сёлета».
Экспертка таксама пракаментавала задаволенасць міністра антыманапольнага рэгулявання і гандлю Аляксея Багданава, які 4 верасня хваліўся, што дзякуючы дзяржаўнаму рэгуляванню коштаў з вытворцаў і гандлю «тлушчык зрэзалі», а «праца трывае, колькасць стратных арганізацыяў гандлю знізілася за першае паўгоддзе». Эканамістка падкрэсліла, што агулам рэнтабельнасць кампаніяў зніжаецца, а гэта перашкаджае развіццю і пераводзіць шмат якія прадпрыемствы ў рэжым «абы выжыць»:
,,«Усё адно заўсёды ў выніку перамагаюць менавіта рынкавыя эканамічныя законы, і, калі іх не ўлічваць, гэта прыводзіць да эканамічных крызісаў. То бок эканоміка спускаецца ў гэты крызіс і знаходзіць новую раўнавагу. Найлепшае, што можна зрабіць, – гэта, безумоўна, зрабіць рынкавае цэнаўтварэнне для бальшыні сфераў эканомікі».
Жорсткае рэгуляванне ў любым выпадку прыводзіць да пэўных перакосаў, пагаршае працу прадпрыемстваў, падкрэсліла Настасся Лузгіна:
«Гэта стварае для людзей ілюзію дабрабыту, аднак усё гэта можа ў выніку прывесці да моцных перакосаў, і давядзецца выходзіць на новую раўнавагу, а раўнавага звычайна настае праз крызіс, які часта суправаджаецца ўзмацненнем інфляцыі і дэвальвацыі».
Юлія Цяльпук, Сцяпан Кубік belsat.eu
