Дар’і А. прызначылі 1 год 8 месяцаў зняволення і адначасова яе вызвалілі з-пад варты, паведамілі «Белсату» ў прэс-службе Акруговага суда Варшава-Прага. Падобна, беларуская грамадзянка цяпер на волі.
Жанчыну прызналі вінаватаю паводле артыкулу «Шпіянаж», які прадугледжвае мінімальна 5 гадоў турмы. Нягледзячы на гэта, Дар’і А. прызначылі эксклюзіўна малы тэрмін.
«Дар’я А. была асуджаная на турэмнае зняволенне тэрмінам 1 год 8 месяцаў з надзвычайным змякчэннем. Перыяд часовага затрымання і ўтрымання пад вартаю з 20.12.2023 па 10.09.2024 быў залічаны ў тэрмін пакарання», – сказалі «Белсату» ў прэс-службе Акруговага суда Варшава-Прага.
Пры гэтым суд скасаваў меру стрымання ў выглядзе ўтрымання пад вартаю:
,,«Суд пастанавіў вызваліць яе. Пастанова накіраваная ў СІЗА, і калі няма падставаў для далейшага ўтрымання пад вартаю з увагі на іншую справу, Дар’я А. цяпер на волі».
Чаму суд вынес такі мяккі вырак і пастанавіў вызваліць шпіёнку, пакуль не вядома. Гэта будзе пазначана ў матывіровачнай частцы прысуду, які пакуль не абнародаваны, і ў прэсавай службе тлумачэнняў не даюць.
Зрэшты, прысуд яшчэ не набыў моц, абскардзіць вырак яшчэ можа як адвакат фігуранткі, гэтак і пракуратура.
Канал «Мая Краіна Беларусь» раней паведамляў, што фігурантка справы плануе намагацца скарачэння тэрміну да 6 месяцаў або хаця б да года.
Дар’ю А., якую западозрылі ў працы на КДБ, затрымалі ў Лодзі недалёка ад Варшавы. Паводле Нацыянальнай пракуратуры Польшчы, жанчына перадавала беларускай спецслужбе «інфармацыю аб дзейнасці, структуры і фінансаванні арганізацыяў, што падтрымоўваюць беларускую апазіцыю». Гэтымі звесткамі карысталася прапаганда, якая называе дэмакратычныя сілы экстрэмістамі і абвінавачвае Польшчу ў рыхтаванні тэрактаў на аб’ектах крытычнай інфраструктуры ў Беларусі на заданне польскіх спецслужбаў.
«Ілжывая інфармацыя падарвала інтарэсы Польшчы і польскай замежнай палітыкі ў падтрыманні дэмакратычнай беларускай апазіцыі і прывяла да дэстабілізацыі стасункаў паміж Польшчаю і Беларуссю», — казалі ў пракуратуры.
Выданне «Зеркало» раней пісала, што Дар’я А. жыла ў Баранавічах, з 2018 года кантактавала з рознымі апазіцыйнымі арганізацыямі, цікавілася іх дзейнасцю і прапанавала сваю дапамогу. Перад выбарамі 2020 года была каардынатаркай кампаніі «Гавары праўду» і даверанай асобаю кандыдата Андрэя Дзмітрыева.
Увосень летась яна пераехала ў Польшчу, спрабавала наладжваць кантакты з актывістамі беларускай дыяспары, трапіць у беларускія арганізацыі, прапаноўваючы валанцёрскую дапамогу, збірала інфармацыю пра Паспалітае рушэнне, аб беларускіх добраахвотніках ва Украіне і тых, хто ім дапамагае.
Паводле неафіцыйных звестак, пра злачынства беларускі стала вядома, калі яна ў нецвярозым стане прагаварылася знаёмцам пра тое, чым насамрэч займаецца ў Польшчы.
Дар’я Форман, Сцяпан Кубік belsat.eu
