Да чацвёртай гадавіны прэзідэнцкіх выбараў у Беларусі Злучаныя Штаты, Вялікая Брытанія і Канада прымеркавалі ўвядзенне новых санкцыяў у дачыненні рэжыму Аляксандра Лукашэнкі.
Міністэрства фінансаў ЗША паведаміла, што ў чорны спіс дададзены 14 юрыдычных асобаў з Беларусі. Пад абмежавання трапілі авіякампаніі «Белканта» і «Рада», металургічны завод «Легмаш», КБ «Беспілотныя верталёты», «Грассвэр», «Алюртех», ТАА «Лазерныя прыборы і тэхналогіі», ТАА «Дакладная механіка», «Рузэкспедыцыя», ТАА «Рухсервматор», ТАА «Влатэ Лагістык», ТАА «МОТ», ТДА «Дыскамс», УП «Рубістар».
Акрамя таго, пад санкцыі трапіў самалёт Аляксандра Лукашэнкі - Boeing 767-300 з рэгістрацыйным нумарам EW-001PB. Блогер Антон Матолька заўважыў, што цяпер пад санкцыямі ЗША знаходзіцца ўвесь авіяпарк самаабвешчанага кіраўніка Беларусі.
У чорны спіс ЗША таксама дадалі 19 фізічных асобаў: Уладзімір Аркадзьеў, Алег Барабанаў, Юры Чывель, Уладзімір Чудакоў, Аркадзь Дзіменштэйн, Алег Герасім, Дзмітрый Ішчанка, Сяргей Касцянок, Яўген Крахоцін, Аляксандр Лешчанка, Яўген Міхалап, Іван Нарэйка, Уладзіслаў Паўленка, Алег Пятроў, Вікторыя Саўрук, Сяргей Сідарук, Аляксей Яворскі, Дзмітрый Замулевіч, Аляксандр Жарскі. Мяркуючы па ўсім, яны трапілі пад санкцыі з той прычыны, што з’яўляюцца кіраўнікамі кампаніў, што цяпер трапілі ў чорны спіс.
Вялікая Брытанія ўвяла санкцыі супраць чатырох кіраўнікоў папраўчых калоніяў, якія датычны да ціску на палітвязняў: начальнік магілёўскай ПК № 15 Аляксей Лазарэнка; былы начальнік наваполацкай ПК № 1 Андрэй Пальчык; начальнік ПК № 3 Філіп Стурчанка; начальнік гомельскай ПК № 4 Дзяніс Талсцянкоў.
Таксама Брытанія ўвяла абмежаванні супраць трох прадпрыемстваў ВПК, якія задзейнічаны ў забеспячэнні патрэбаў расейскай арміі ў вайне з Украінай:
- ААТ «НДІЭВМ» - афіляваная з урадам арганізацыя, якая ажыццяўляе дзейнасць у сферы абароннай прамысловасці;
- вытворца станкоў ААТ «Станкагомель» , які экспартуе прадукцыю ў Расею для выкарыстання ў расейскім ваенна-прамысловым сектары;
- станкабудаўнічае прадпрыемства ТАА «Рухсерваматор», якое працуе на РФ.
Акрамя таго, урад Вялікай Брытаніі выдзяляе 2,5 млн фунтаў стэрлінгаў ($ 3,18 млн) на падтрымку дзейнасці ў галіне правоў чалавека і грамадзянскай супольнасці ў Беларусі.
«Мы падтрымліваем народ Беларусі ў яго імкненні да свабоды і дэмакратыі і заклікаем рэжым неадкладна і безумоўна вызваліць усіх палітычных зняволеных», — заявіў брытанскі міністр замежных справаў Дэйвід Лэмі.
Канада ўвяла санкцыі супраць 10 фізічных асобаў, уключаючы Мікалая Лукашэнку - малодшага сына самаабвешчанага кіраўніка Беларусі. Таксама ў чорны спіс трапілі суддзі Юлія Блізнюк, Віталь Сініла, Ірына Прадун, Валянціна Новікава, Вадзім Мозаль і Аляксандр Абашын, начальнік Генштаба Узброеных сілаў Павел Муравейка, намеснік міністра абароны па ўзбраенню Андрэй Федзін і першы намеснік старшыні Дзяржаўнага вайскова-прамысловага камітэту Алег Мішчанка.
Акрамя таго, Канада ўвяла санкцыі супраць шасці юрыдычных асобаў: «Менскага электратэхнічнага заводу», КБ «Дісплэй», «Менскага навукова-даследчага прыборабудаўнічага інстытуту», «Навукова-даследчага інстытуту вылічальныш машын», «Планару» і «Гомсельмашу».
Увечары 9 жніўня ўрады ЗША, Вялікай Брытаніі, Канады і краінаў ЕЗ апублікавалі сумесную заяву, у якой падкрэсліваецца, што санкцыі, якія былі сёння абвешчаны, з'яўляюцца часткай «скаардынаваных шматбаковых намаганняў па прыцягненню да адказнасці рэжыму Лукашэнкі.
«Мы заклікаем беларускія ўлады неадкладна і безумоўна вызваліць амаль 1400 палітычных зняволеных, якія знаходзяцца ў беларускіх турмах.
Мы працягнем разглядаць розныя варыянты, у тым ліку дадатковыя санкцыі, каб прыцягнуць да адказнасці тых, хто спрыяе здушэнню рэжымам Лукашэнкі дэмакратыі ў Беларусі.
Мы таксама працягнем рабіць значныя крокі, каб выкрыць і спыніць плынь важнай падтрымкі і кампанентаў праз Беларусь, якія распальваюць несправакаваную вайну Расеі супраць Украіны, захоўваючы пры гэтым нашу падтрымку беларускага народа», - гаворыцца ў сумеснай заяве.
Глеб Нержын «Белсат»
