9 верасня ў Беларусі адбываюцца вялікія пажары. Паводле зводак МНС, ратавальнікі працуюць над тушэннем пажараў на Альманскіх балотах, а таксама ў Калінкавіцкім раёне. Прычынай пажараў мог стаць падпал сухой расліннасці.
Для тушэння моцнага пажару на тэрыторыі заказніка рэспубліканскага значэння «Альманскія балоты» зайдзенічана авіяцыя – у прыватнасці, верталёты МНС Мі-8 і Мі-17.
Працы абцяжараныя адсутнасцю пад’язных шляхоў і высокай забалочанасцю мясцовасці.
Плошча пажару на Альманскіх балотах дасягае 70 гектараў.
Як заўважыў тэлеграм-канал «МотолькоПомоги», пажар бачны нават з космасу: на спадарожнікавым здымку NASA можна прыкмеціць, што гарыць тэрыторыя паўночна-заходняй часткі заказніка.
Акрамя таго, у выніку пажару ў Вялікіх Аўцюках, што ў Калінкавіцкім раёне Гомельскай вобласці, згарэлі чатыры дамы. Пяты дом быў пашкоджаны агнём. На шчасце, паведамляе тэлеграм-канал Гомельскага аблвыканкаму, абышлося без ахвяраў.
Пажар у Вялікіх Аўцюках ліквідавалі дзесяць аўтацыстэрнаў з Калінкавічаў, Мазыра і Гарочычаў. Папярэдняя прычына пажару – падпальванне сухой расліннасці.
У Гомельскай і Магілёўскай абласцях у сувязі з пажарнай небяспекай абвясцілі чырвоны ўзровень небяспекі.
Раман Шавель belsat.eu
