Аляксандр Лукашэнка павіншаваў кіраўніка КНДР Кім Чэн Ына з Днём утварэння Карэйскай Народна-Дэмакратычнай Рэспублікі і заявіў, што разлічвае на «значны прагрэс» па некалькіх напрамках.
У віншаванні адзначаецца «істотная актывізацыя дыялогу паміж Беларуссю і КНДР на ўсіх узроўнях».
«Перакананы, Мінск і Пхеньян хутка дасягнуць значнага прагрэсу ў наладжванні практычнага ўзаемадзеяння ў такіх галінах, як сельская гаспадарка, медыцына і фармацэўтыка, адукацыя», — падкрэсліў Аляксандр Лукашэнка.
Кім Чэн Ыну Лукашэнка пажадаў здароўя і поспехаў у яго дзейнасці, а народу КНДР — прагрэсу, стабільнасці і дабрабыту.
На думку Лукашэнкі, народ КНДР «мнагакратна даводзіў непахіснасць калектыўнай волі і імкненне да самастойнасці».
«Увесь свет з'яўляецца сведкам таго, як Карэйская Народна-Дэмакратычная Рэспубліка з гонарам ідзе па шляху незалежнага развіцця», — гаворыцца ў віншаванні.
Арсен Рудэнка belsat.eu
