Для беларускай тэнісісткі, якая выступае ў нейтральным статусе, сёлета гэта другая перамога на турнірах «Вялікага шлему».
У фінале Адкрытага чэмпіянату ЗША Арына Сабаленка перамагла амерыканку Джэсіку Пегулу з лікам 7:5, 7:5.
Для беларускай тэнісісткі гэта другі сёлета трафей на турнірах «Вялікага шлему», першым быў кубак Australian Open. Да Сабаленкі перамогі ў Аўстраліі і ЗША за адзін год мела нямецкая спартоўка Анжаліка Кербер, гэта было ў 2016-м.
На прэс-канферэнцыі пасля гульні Арына Сабаленка сказала, што ганарыцца сабою і сваёй камандаю:
«Пасля таго, як я страціла бацьку, маёй мэтаю заўсёды было ўпісаць імя нашай сям'і ў гісторыю тэнісу. Кожны раз, калі я бачу сваё імя на трафеі, я ганаруся сабою, ганаруся сваёй сям'ёю, якая ніколі не адмаўлялася ад маёй мары і рабіла ўсё магчымае, каб я працягвала жыць».
Беларуская тэнісістка назвала перамогу на US Open адным з найлепшых момантаў жыцця:
«Я не ведаю, як апісаць гэтае адчуванне. Ты плачаш, ты смяешся, ты адчуваеш усе эмоцыі адначасова. Гэта найлепшае пачуццё. Я вельмі хачу, каб кожны мог адчуць гэта».
Пасля перамогі Сабаленка застанецца на другім месцы ў рэйтынгу WTA. Лідарства, нягледзячы на паразу ў чвэрцьфінале гэтага US Open, захавае прадстаўніца Польшчы Іга Свёнтэк.
Сабаленка зазнала вострую крытыку за сваю палітычную пазіцыю: у 2020 годзе тэнісістка падпісала праўладны ліст спартоўцаў, у 2021-м брала ўдзел у запісе навагодняга звароту Лукашэнкі.
Летась на прэс-канферэнцыі яна заявіла, што не падтрымлівае вайны, а значыць, не падтрымлівае Лукашэнкі «проста цяпер». Нягледзячы на гэта, самаабвешчаны кіраўнік Беларусі павіншаваў Сабаленку з перамогаю на US Open, звярнуўшыся да яе на «ты»:
«У напружаных паядынках з лідарамі сусветнага рэйтынгу ты праявіла ўсе свае найлепшыя спартыўныя якасці. Дзе б ні адбываліся спаборніцтвы, упэўнены, ты адчуваеш энергію і гарачае падтрыманне родных заўзятараў».
У кар'еры Арыны Сабаленкі гэта трэцяя перамога на турнірах «Вялікага шлему». Летась, як сёлета, яна таксама выйграла Australian Open.
Сцяпан Кубік belsat.eu
