Жыхара Меншчыны будуць судзіць паводле абвінавачанняў у адмаўленні генацыду беларускага народу і абразе Аляксандра Лукашэнкі, якія былі апублікаваныя ў «Аднакласніках».
Паводле матэрыялаў справы, 54-гадовы жыхар Менскага раёна з кастрычніка 2020 года па лістапад 2023 года стварыў у сацыяльнай сетцы «Аднакласнікі» адкрытую групу, у якой з’яўляўся адміністратарам.
У групе ён размясціў шэраг публікацый, у якіх даваў «відавочна негатыўную ацэнку» Аляксандру ЛУкашэнку.
,,«Там жа размясціў публікацыю, у якой адмаўляў масавае знішчэнне вайскоўцамі 118-га шуцманшафт-батальёна ахоўнай паліцыі і асаблівага батальёна СС А. Дырлевангера мірных жыхароў вёскі Хатынь у выніку карнай аперацыі 22 сакавіка 1943 года, вынікам якой сталі спаленне жыўцом і расстрэл 149 грамадзянаў БССР, у тым ліку 75 дзяцей», – адзначаецца на сайце Генеральнай пракуратуры РБ.
Мужчына зараз знаходзіцца пад вартай.
Гэта фактычна першы суд, які адбудзецца па справе аб адмаўленні генацыду беларускага народу.
У снежні 2021 года Палата прадстаўнікоў Нацыянальнага сходу прыняла закон «Аб генацыдзе беларускага народа». На пачатку 2022 года ў Крымінальны кодэкс Беларусі дадалі артыкул, які прадугледжвае пакаранне за адмаўленне факту «генацыду беларускага народа». За гэта могуць прызначыць да пяці гадоў пазбаўлення волі, а ў выпадку паўторнага парушэння – да дзесяці гадоў.
Згодна з законам, пад «генацыдам беларускага народа» маюцца на ўвазе злачынствы, учыненыя нацыстамі і іх памагатымі, а таксама антысавецкімі «нацыяналістычнымі фармаваннямі» на тэрыторыі Беларускай Савецкай Сацыялістычнай Рэспублікі (БССР) у перыяд з 22 чэрвеня 1941 года па 31 снежня 1951 года.
Раман Шавель belsat.eu
