«Кіберпартызаны» святкуюць чатырохгоддзе праекту і зрабілі сабе падарунак – на сайце праўладнага выдання рэкламуюць сэрвісы бяспечнай камунікацыі, дэанону сілавікоў і злітыя базы зваротаў у КДБ.
«4 гады таму з'явілася аб'яднанне "Кіберпартызанаў" — людзей, якія сродкамі высокіх тэхналогій змагаюцца супраць дыктатуры і яе савецкіх перажыткаў. За гэты час нашыя валанцёры зрабілі шмат карысных праектаў для беларусаў. Сёння мы нагадваем пра некаторыя праекты на старонцы варожага рэсурсу "Правда Гомель" gp.by (даступны толькі з беларускага IP)», — пішуць «Кіберпартызаны».
На сайце «Правда Гомель» у раздзеле «Выбар рэдакцыі» з’явіліся паведамленні пра «Партызанскі Тэлеграм», «Партызанскія СМС», бот па дэанону супрацоўнікаў МУС і КДБ «Вока Змагара», спасылка на сайт са зваротамі ў КДБ за 9 гадоў, сэрвіс бяспечных апытанняў грамадскага меркавання «Ап!» і анонс новага сэрвісу «Картка Беларуса».
«Не забудзем таксама пра больш за 50 публічных кібераперацый і звыш 100 ботаў зваротнай сувязі для беларускіх ініцыятываў і арганізацый. А таксама шмат сакрэтных праектаў, — падводзяць вынікі працы «Кіберпартызаны». — Мы ганарымся тым, што ў нашай камандзе столькі актыўных, таленавітых людзей, якія змагаюцца з рэжымам і дапамагаюць беларусам. Будзем радыя таксама новым валанцёрам з жаданнем накіроўваць вольны час на барацьбу з дыктатурай. Разам да Перамогі! Жыве Беларусь!».
Каля а 17 гадзіны па Менску сайт выдання паведамляў пра «тэхнічныя работы». Старонка для прагляду была недасяжная.
Арсен Рудэнка belsat.eu
