Мінабароны ўпершыню адрэагавала на залёты дронаў «Shahed» у Беларусь. Гэта здарылася пасля таго, як пад Гомлем прыйшлося збіваць гэтыя дроны, што аказалася занадта прыкметным. Адказ атрымаўся змазаным, а прапагандысты абвінавачваюць Украіну. Толькі тут шэраг нестыковак, а пра абвестку людзей аб небяспецы зусім забыліся. Маніторынгавая група «Беларускі Гаюн» падвяла вынікі інцыдэнту.
«Сёння ноччу, 5 верасня, быў зафіксаваны факт парушэння дзяржаўнай мяжы Рэспублікі Беларусь у паветранай прасторы, як мяркуецца, беспілотнымі лятальнымі апаратамі.
Была прынятая пастанова на іх знішчэнне. Своечасовымі дзеяннямі дзяжурных сіл па супрацьпаветранай абароне ўсе мэты — парушальнікі былі знішчаны. Па гэтым факце праводзіцца праверка», — заявіў начальнік Галоўнага штаба — першы намеснік камандуючага ВПС і войскамі СПА палкоўнік Сяргей Фралоў.
«Беларускі Гаюн» адзначае, што сістэматычныя залёты расійскіх «Shahed-131/136» у Беларусь адбываюцца з пачатку ліпеня. 16 ліпеня паведамлялася пра падзенне беспілотніка ў Гомльскай вобласці, а 29 жніўня — пра баявую працу знішчальніка ВПС РБ па беспілотніках.
«Усе гэтыя інцыдэнты засталіся без афіцыйных каментароў. Фіксаваліся толькі спробы некаторых прапагандысцкіх рэсурсаў усё адмаўляць. Аднак падзеі ў ноч з 4 на 5 верасня, якія адбываліся над Гомлем (горад з паўмільённым насельніцтвам) ігнараваць ужо было немагчыма. Занадта вялікі атрымаўся рэзананс. Можна не сумнявацца, што калі б беспілотнікі збівалі над менш урбанізаванай тэрыторыяй, афіцыйнай рэакцыі б не было», — піша маніторынгавая група.
Адкуль узяліся дроны, вырашылі змаўчаць
«Таксама чыноўнікі не кажуць аб удзеле падраздзяленняў СПА ВС РФ у адлюстраванні "уварвання" сваіх жа беспілотнікаў.
,,Прадстаўнікі рэжыму Лукашэнкі ўсяляк пазбягаюць прызнанне таго, што беспілотнік быў запушчаны Расеяй падчас атакі па Украіне. Гэта не ўпісваецца ў канцэпцыю "братэрскіх народаў" і "саюзніцкіх адносін" паміж краінамі. Хоць гэтая інфармацыя ёсць у распараджэнні беларускіх вайскоўцаў», — падкрэслівае «Беларускі Гаюн».
Дарадца-пасланнік амбасады Беларусі ў Расеі, дэпутат Палаты прадстаўнікоў Аляксандр Шпакоўскі ўвогуле напісаў пра «чарговую ўзброеную правакацыю з боку Украіны».
«Асноўным контраргументам [прапаганды], чаму збітыя Shahed-131/136 не абавязкова маглі належаць Расеі, з'яўляўся ўдзел расейскай СПА ў збіцці расейскіх беспілотнікаў», — працягвае «Беларускі Гаюн».
Прапаганда стала хваліць Мінабароны за «своечасовыя дзеянні» дзяжурных сіл, маўляў, вайскоўцы працуюць, «каб Беларусь працягвала жыць у міры і стабільнасці».
Толькі ніхто з беларускіх чыноўнікаў і прапагандыстаў не кажа пра тое, што жыхароў Гомля не папярэдзілі пра небяспеку, а таксама не чуваць пра разгляды па факце залёту больш за 20 расейскіх Shahed-131/136 у Беларусь за апошнія 2 месяцы, адзначае маніторынгавая група.
«Аб залётах расейскіх беспілотнікаў у Беларусь насельніцтва даведаецца не ад "афіцыйных крыніц", а ад украінскіх маніторынгавых рэсурсаў», — заключае «Беларускі Гаюн».
Арсен Рудэнка belsat.eu
