Яго абвінавацілі ў атрыманні хабару на 35 тысячаў еўра. Прысудзілі столькі, колькі і прасіў пракурор.
Суд Ленінскага раёну Менску 5 верасня прызнаў былога намесніка міністра энергетыкі Міхаіла Міхадзюка вінаватым у атрыманні хабару (ч.3 арт. 430 КК РБ) і прысудзіў яму 6 гадоў пазбаўлення волі ў папраўчай калоніі ўзмоцненага рэжыму, а таксама штраф у тысячу базавых велічыняў – 40 тысяч рублёў, піша «БелТА».
Міхадзюка таксама пазбавілі права займаць пасады, звязаныя з арганізацыйна-распарадчай і адміністрацыйна-гаспадарчай дзейнасцю, на тэрмін у 5 гадоў. У сувязі з амністыяй Міхадзюку пастанавілі скараціць пакаранне на адзін год. Яму таксама залічылі зняволенне перад прысудам як дзень за паўтара. Гэты прысуд можа быць абскарджаны.
Калі дакладна быў затрыманы Міхадзюк, невядома. Са словаў Аляксандра Лукашэнкі, Следчы камітэт распачаў крымінальную справу супраць Міхадзюка 26 студзеня. Пасады, на якой Міхадзюк быў адказным за праект БелАЭС, яго пазбавілі ўказам ад 28 снежня 2023 года.
Паводле абвінавачвання, былы чыноўнік прыняў хабар ад прадстаўніка кампаніі «RIKO», за што прасоўваў яе інтарэсы пры закупцы еўрапейскага абсталявання. Усяго хабар склаў €35 тысяч. Частку грошай ён нібыта выдаткаваў на ўласнае лячэнне і лячэнне сястры, а таксама на рамонт і рэканструкцыю бацькоўскага дома ў Асіповіцкім раёне. Незаконна атрыманыя грошы, як сцвярджаецца, Міхадзюк кампенсаваў дзяржаве, а 5 тысяч рублёў перадаў у РНПЦ дзіцячай анкалогіі.
Прысуд такі, як і прасіў пракурор. Дзяржабвінавачанне адзначыла, што ў справе Міхаіла Міхадзюка ёсць змякчальныя абставіны. Гэта «чыстасардэчнае раскаянне, актыўнае спрыянне выяўленню злачынстваў, яўку з павіннай, пакрыццё даходу, атрыманага злачынным шляхам, у тым ліку ўнясенне на разліковы рахунак РНПЦ дзіцячай анкалогіі, гематалогіі і імуналогіі дабрачыннага ўнёску».
Чыноўнікі, якіх у Беларусі судзяць за карупцыю, далёка не заўсёды адбываюць поўнае пакаранне, нярэдка іх вызваляюць датэрмінова і прызначаюць на невысокія кіроўныя пасады – напрыклад, дырэктарамі калгасаў.
Алесь Наваборскі belsat.eu
