Беларуску Дзіяну Маісеенка, якая была завтрыманая на грузінска-армянскай мяжы, вызвалілі. Пра гэта паведамляе Офіс Святланы Ціханоўскай.
«Мы працягваем працаваць з армянскім МЗС па справе Дзіяны Маісеенкі і іншых беларусаў, якіх вышуквае рэжым Лукашэнкі па палітычных прычынах. Офіс Святланы Ціханоўскай атрымаў запэўніванні, што Ерэван не будзе выдаваць рэжыму Лукашэнкі пераследаваных па палітычных прычынах грамадзян Беларусі», – адзначае Офіс Святланы Ціханоўскай.
З яго паведамлення вынікае, што юрыдычная частка каманды накіравала дакумент да ўладаў Арменіі аб неправамерных дзеяннях рэжыму Лукашэнкі і палітычных справах, такіх як справа Дзіяны, якія заводзяцца супраць грамадзян Беларусі з мэтай палітычнага пераследу.
«Дзякуючы сумесным намаганням, Дзіяна ўжо на свабодзе. Спадзяемся, што і астатнія выпадкі таксама вырашацца пазітыўна», – паведамляе Офіс.
Юрыст, адвакат Алесь Міхалевіч паведаміў, што Дзіяне абмежавалі выезд з Арменіі на час разгляду экстрадыцыйнай справы.
«Па рашэнні Пракуратуры Арменіі вырашана не браць яе пад варту», – адзначыў ён.
Дзіяна была арыштаваная, бо знаходзіцца ў вышуку ў Беларусі паводле часткі 1 артыкула 342 Крымінальнага кодэксу («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»). У Беларусі ёй пагражае да 4 гадоў пазбаўлення волі. Гэта артыкул шырока ўжываецца супраць тых, хто выйшаў на пратэсты супраць гвалту і фальсіфікацыі выбараў у Беларусі ў 2020 годзе.
Арсен Рудэнка belsat.eu
