Саўмін удакладніў пералік відаў дзейнасці для індывідуальных прадпрымальнікаў і рамеснікаў пастановай №637 ад 30 жніўня.
Згодна з дакументам, ІП не змогуць займацца:
- дзейнасцю ў сферы выканальніцкіх мастацтваў;
- дзейнасцю, якая спрыяе правядзенню культурна-відовішчных мерапрыемстваў.
Таксама з'явіліся змены для тых, хто займаецца самастойнай прафесійнай дзейнасцю. Яны не змогуць займацца «дзейнасцю, якая ажыццяўляецца па заказах спажыўцоў і звязаная з віншаваннем з днём нараджэння, Новым годам і іншымі святамі незалежна ад месца іх правядзення».
У Беларусі існуе спіс відаў дзейнасці, якімі могуць займацца ІП. З 1 кастрычніка чыноўнікі не рэгіструюць ІП, калі яны займаюцца відамі дзейнасці, якія не трапілі ў пералік.
Да канца 2025 года прадпрымальнікі павінны перайсці ў юрыдычную асобу, калі яны хочуць працягваць ажыццяўляць такія віды дзейнасці.
Арсен Рудэнка belsat.eu
