Часова абавязкі камандуючага Паветранымі сіламі выконвае камандзір Паветранага камандавання «Цэнтр» Анатоль Крываножка.
Прэзідэнт Украіны Уладзімір Зяленскі 30 жніўня падпісаў указ аб звальненні Міколы Алэшчука з пасады камандуючага Паветранымі сіламі Збройных сілаў Украіны. Генеральны штаб ЗСУ паведаміў, што часова абавязкі камандуючага паветранымі сіламі будзе выконваць камандзір паветранага камандавання «Цэнтр» генерал-лейтэнант Анатоль Крываножка.
Прычыны звальнення ва ўказе не называюцца. Зяленскі ў вечаровым звароце сказаў толькі, што вырашыў змяніць камандуючага Паветранымі сіламі, але прычынаў не назваў. Але дадаў:
«Я бязмежна ўдзячны ўсім нашым вайсковым лётчыкам, усім інжынерам, усім байцам мабільных агнявых групаў, разлікаў супрацьпаветранай абароны. Усім, хто сапраўды змагаецца за Украіну – для рэзультату. І гэта неабходна і на камандным узроўні: мы павінны ўзмацняцца. І берагчы людзей. Берагчы асабовы склад – берагчы ўсіх нашых ваяроў».
Паводле звестак «The Wall Street Journal», 26 жніўня ва Украіне ўпершыню разбіўся амерыканскі самалёт «F-16». Гэта адбылося падчас абароны Украіны ад паветранай атакі Расеі. Пілот загінуў.
Скандальная ўкраінская дэпутатка Мар’яна Бязуглая заявіла пасля гэтага, што пілот нібы быў збіты ўкраінскімі вайскоўцамі – зенітна-ракетным комплексам «Patriot». І гэта, паводле яе, нібы ўжо трэці выпадак, калі ўкраінская супрацьпаветраная абарона збівае свой жа самалёт, а Паветраныя сілы хаваюць інфармацыю пра гэта.
Алэшчук у адказ на гэта запэўніў, што папярэднія справаздачы пра катастрофу адразу атрымалі вышэйшае кіраўніцтва Укріны і партнёры са Злучаных Штатаў, а публічна раскрываць дэталі не могуць з прычынаў вайны. Алэшчук таксама выказаў думку, што Бязуглую выкарыстоўваюць для дыскрэдытацыі вышэйшага вайсковага кіраўніцтва Украіны, ёй «апладуе ўся Расея».
Украіна і ЗША не пацвярджалі і не абвяргалі, што самалёт быў збіты агнём сваіх жа. Але крыніца брытанскага BBC у вайсковым камандаванні расказала, што самалёт не пацярпеў ад варожага агню і што прычынай катастрофы не была памылка пілота.
Гэтым летам Украіна згубіла яшчэ некалькі самалётаў ад удараў па аэрадромах. Акрамя таго, 12 жніўня стала вядома пра смерць камандзіра авіяцыйнага звяна ў палёце. Агулам за час поўнамаштабнай вайны Украіна страціла не менш як сем дзясяткаў самалётаў, з іх у 2024 годзе прынамсі 10.
Мікола Алэшчук узначальваў Паветраныя сілы Украіны з 9 жніўня 2021 года, да таго пяць гадоў кіраваў паветраным камандаваннем «Усход». У 2022 годзе атрымаў званне Героя Украіны.
Алесь Наваборскі belsat.eu
