На выездзе з Беларусі ў краіны ЕЗ налічылі сотні легкавікоў і дзясяткі аўтобусаў. Час чакання на мяжы з Літвою дасягае 30 гадзінаў, з Польшчаю – крыху менш за содні.
Паводле звестак Дзяржаўнага памежнага камітэту Беларусі, апоўдні ў чарзе перад пунктам пропуску ў Берасці было 350 легкавых аўтамабіляў. У Telegram-чатах пішуць, што чакаць даводзіцца каля 20 гадзінаў.
Нікуды не падзеліся і «ўлезуны», з якімі змагаюцца сваімі сіламі.
,,«Даішнікі сказалі, што яны нічога не могуць зрабіць, толькі калі на відэа трапіць, як праз неперарывістую паласу праедуць. А хто там лезе, прадае і гэтак далей – гэта не іхныя паўнамоцтвы», – піша падарожнік.
У чатах заклікаюць скардзіцца ў Менск, бо, маўляў, берасцейскія ўлады «сваіх жа пакрываюць і толькі смяюцца».
На тым баку мяжы – каля 110 аўтаў; паводле падарожнікаў, чакаць давядзецца не меней за 11 гадзінаў.
Аўтобусаў перад «Варшаўскім мостам» – 54. У чатах багата сведчанняў таго, як пасажыры перасаджваюцца ў аўтобусы бліжэй да шлагбаума, і тады можна ўкласціся ў 7–8 гадзінаў. Калі ж чакаць «ад званка да званка», то спатрэбіцца 19 гадзінаў жыцця.
Шлях дадому аўтобусам – найхутчэйшы, час чакання – каля 11 гадзінаў. І было б шпарчэй, калі б не допыты на беларускай мяжы:
,,«Вельмі доўга ў Беларусі афармляюць многіх асобаў з небеларускімі пашпартамі. 2–3 гадзіны аўтобусы чакаюць».
У «Каменным Лозе» налічылі 190 аўтаў, час чакання дасягае 30 гадзінаў. Сведчанні пра глыбіню надгляду розныя. Нехта піша, што службоўцы на абодвух межах вельмі ветлівыя, «багажнік адкрылі-закрылі»: «Літоўцы пра харчы не пыталіся, адзінае, спыталі пра цыгарэты і спіртное».
Іншыя паведамляюць: «Літоўцы надглядаюць пільна, усё з багажніку, усе нішы аблазілі і салон з ліхтарыкам».
У бок Беларусі – толькі 15 легкавікоў.
Аўтобусаў у «Каменным Лозе», паводле Памежнага камітэту, 15. І з імі бяда: чакаюць 19–20 гадзінаў. Як пішуць у чатах, на дарогу ў такую блізкую і далёкую Літву цяпер варта закладаць содні.
На падсадку непадалёк мяжы там амаль не бяруць. Праўда ці не, але ў чаце з’явіўся такі допіс:
,,«Да кіроўцы падышоў работнік транспартавай міліцыі і сказаў, што пасажыры здымаюць на відэа і потым публікуюць, як яны пераходзяць з аўтобуса ў аўтобус, ды пазначаюць кошт і нумары аўтобусаў. Работнік папярэдзіў кіроўцу пра наступствы і сказаў: маўляў, робіце дабро для пасажыраў, а яны самыя вас здаюць».
Дадому аўтобусам даволі хутка: 3–4 гадзіны.
У «Беняконях» цяпер 90 легкавікоў, чакаюць больш за содні. «Літоўцы не працуюць наогул. Памежніца толькі і сказала: «Ну, вы ж разумееце, гэта не ад нас залежыць», – паскардзіўся адзін падарожнік.
Чаргі ў бок Беларусі няма, мяжу пралятаюць за дзве гадзіны.
Таксама ў «Беняконях» няма аўтобуснай чаргі. Што ў адзін, што ў другі бок афармленне займае каля чатырох гадзінаў.
У «Грыгораўшчыне», паводле Памежнага камітэту, свабодна. Як пішуць у чатах, мяжу мінаюць прыкладна за чатыры гадзіны.
«Мінанне пераходу адрозніваецца ад іншых пераходаў Беларусі, Літвы і Польшчы: вялікая кабінка з мытняй і пашпартным унутры, туды ўсе ідуць тоўпіцца з усіх машынаў. На латышскім пераходзе невымоўны пах усіх відаў спіртнога, вылітага ў дарожную каналізацыю», – гэтак апісала свае ўражанні адна падарожніца.
Сцяпан Кубік, «Белсат»
