Міністр эканомікі Беларусі Юрый Чабатар анансаваў скарачэнне пераліку відаў рамеснай дзейнасці, і майстрам, якім не пашчасіць, давядзецца мяняць статус і плаціць больш падаткаў. Улады ціснуць на тое, што ў гэтай дзейнасці мусіць быць беларуская самабытнасць, але бізнесовец Аляксандр Кныровіч упэўнены: правілы змяняюць проста для таго, каб спагнаць з рамеснікаў больш грошай.
Рамесніцкую «праблему» спрабавалі развязаць 19 жніўня на нарадзе ў Аляксандра Лукашэнкі. Ён хваляваўся, каб майстры, якіх выкінуць з пераліку дазволенай дзейнасці, не сталі часткаю ценявой эканомікі і каб не страціць «якое-кольвек рэдкае рамяство» ды захаваць культурную спадчыну Беларусі.
Пасля нарады міністр эканомікі Юрый Чабатар абвесціў, што «галоўнае патрабаванне да пераліку» ўзгодненае:
«Гэта найперш захаванне аўтэнтычных, самабытных нашых рамёстваў. Усё гэта мае вырабляцца рамеснікамі ўласнымі рукамі і з дапамогаю прымітыўных прыладаў працы».
Відаў дзейнасці, дазволеных для рамеснікаў, паменее, паведаміў чыноўнік:
«Тыя віды, што папулярныя і развітыя, напрыклад, вырабы з эпаксіднай смалы, гіпсу, варка мыла — тут не стае нашай беларускай самабытнасці. Значыцца, такія віды дзейнасці з гэтага пераліку сыдуць».
Міністр прапанаваў майстрам, якія апынуцца за бортам, пайсці ў самазанятыя і плаціць падатак на прафесійны прыбытак — 10 %. Сапраўдныя, паводле ўладаў, рамеснікі будуць штомесяц аплачваць 6,5 рубля адмысловага мыта, як і раней.
Прадпрымальнік, блогер і вядоўца праграмы «Атма$фера» на «Белсаце» Аляксандр Кныровіч абураецца: яму незразумела, паводле якога прынцыпу ўлады будуць пастанаўляць, якая дзейнасць адпавядае беларускай самабытнасці, а якая — не:
«Гэта вельмі дзіўна, таму што, калі мы кажам пра беларускую самабытнасць, то патрабуецца, напэўна, ладзіць нейкую камісію, каб вызначыць, ці з'яўляецца выраб таго самага мыла беларускай самабытнасцю, калі яно робіцца з беларускіх траваў ці, не ведаю, з карэнняў якіх. Тут патрабуецца не асабістае меркаванне чыноўнікаў, а нейкае навуковае абгрунтаванне».
Суразмоўца карэспандэнта «Белсату» ўпэўнены, што ўсё робіцца дзеля таго, каб майстры пачалі плаціць больш грошай у бюджэт, і аніякім клопатам пра людзей або культурную спадчыну тут і не пахне:
«Мы бачым зусім іншы працэс, ён не грунтуецца на сістэмных падставах, ён грунтуецца толькі на адзіным жаданні падвысіць падаткі, прычым зрабіць гэта без абмеркаванняў і празрыстых працэдураў. Мы бачым жаданне падвысіць гэтыя падаткі да 10 % ад сумы абароту і не болей за тое».
Кныровіч адзначыў, што дзяржава мусіць не спаганяць больш грошай з рамеснікаў, а, наадварот, дапамагаць ім:
«Вельмі сумна, што дзяржава ставіцца такім дзіўным чынам да рамеснікаў. Вельмі сумна не бачыць крокі насустрач, падтрыманне гэтых людзей, чый сэнс і існаванне не ў тым, каб яны прыносілі падаткі, а каб рабілі карысную прадукцыю і працавалі на сябе і для сябе, каб не атрымлівалі ад дзяржавы ніякіх грошай і ўсяго астатняга. Дзіўна, што чыноўнікі гэта не разумеюць, але гэта не ўпершыню, таму гэта агульны трэнд на падвышэнне падаткаў у эканоміцы».
У цяперашнім пераліку відаў рамеснай дзейнасці — 28 пунктаў. Што яшчэ адтуль знікне, акрамя згаданых міністрам эканомікі вырабаў з гіпсу і смалы ды мыла, пакуль не вядома. Улады абяцаюць апублікаваць спіс «бліжэйшым часам».
Раней у Беларусі зацвердзілі пералік відаў дзейнасці для індывідуальных прадпрымальнікаў (там 127 пунктаў) і для самазанятых (87 пазіцыяў).
Сцяпан Кубік belsat.eu
