Французскія ўлады выдалі ордар на арышт Паўла Дурава і ягонага брата Мікалая. Гэта адбылося яшчэ ў сакавіку 2024 года.
Паводле выдання «Politico», французскія ўлады выдалі ордары на арышт генеральнага дырэктара «Telegram» Паўла Дурава і ягонага брата-сузаснавальніка Мікалая Дурава яшчэ ў сакавіку 2024 года.
Справа, паводле якой былі выдадзеныя ордары, датычыцца адмовы «Telegram» супрацоўнічаць з французскай паліцыяй па факце сэксуальнага гвалту над дзецьмі.
Ордары, як паведамляе выданне са спасылкай на чалавека, што быў знаёмы з ходам справы, былі выдадезныя пасля таго, як «Telegram» не адказаў на папярэдні судовы запыт аб ідэнтыфікацыі карыстальніка платформы.
Ордары на арышт былі выдадзеныя 25 сакавіка паводле абвінавачанняў, якія ўключаюць «саўдзел у захоўванні, распаўсюдзе, прапанове або прадстаўленні парнаграфічных малюнкаў непаўналетніх у складзе арганізаванай групы».
Справа, паводле якой былі выдадзеныя ордары, вялася аддзелам па барацьбе з кіберзлачыннасцю пракуратуры Парыжу. Згодна з ёй падазраваны схіляў непаўналетніх дзяўчынак да адпраўкі «дзіцячай парнаграфіі ўласнай вытворчасці», а пасля пагражаў апублікаваць яе ў сацыяльных сетках.
Акрамя таго, гаворыцца ў дакуменце, падазраваны паведаміў следству, што згвалціў малалетняе дзіця. Тым не менш «Telegram» не адказаў на запыт французскіх уладаў аб ідэнтыфікацыі падазраванага.
Больш за тое, у дакуменце падкрэсліваецца, што «Telegram» не супрацоўнічаў з французскімі і еўрапейскімі ўладамі і ў іншых выпадках, а таксама адзначаецца, што платформу выкарысоўваюць «шматлікія злачынныя групоўкі».
У той жа час выданне падкрэслівае, што няма ніякіх сведчанняў, што браты Дуравы непасрэдна ўдзельнічалі ў незаконнай дзейнасці, выяўленай следствам.
Адвакат Паўла Дурава адмовіўся пракаментаваць ход расследавання выданню. Не сталі каментаваць яго і ў пракуратуры, спаслаўшыся на тое, што расследаванне з’яўляецца сакрэтным.
Мікалай Дураў – старэйшы брат Паўла Дурава і сузаснавальнік «Вконтакте» і «Telegram», які ўвесь час застаўся ў ценю. Паводле словаў Паўла Дурава, менавіта Мікалай стварыў стандарт шыфравання, якія выкарыстоўвае «Telegram».
Нагадаем, што Паўла Дурава затрымалі 25 жніўня ў аэрапорце прыгараду Парыжа. Яго абвінавацілі ў саўдзеле ў наркагандлі, педафіліі і махлярстве з-за адмовы ў супрацоўніцтве з уладамі Францыі.
Раман Шавель belsat.eu
