Падчас перамоваў па абмене зняволенымі згадваўся беларускі палітвязень Анджэй Пачобут, распавёў кіраўнік Бюро нацыянальнай бяспекі Польшчы Яцэк Севера, перадае «TVP INFO». Ён таксама паведаміў, чаму пачобута не аказалася ў абменным спісе і ці разлічвае Польшча яго вызваліць.
«Маючы ў якасці саюзніка амерыканцаў, нам давялося ставіць умовы і рэагаваць на іх запыты. Наколькі мне вядома, падчас перамоваў ўсплывала імя Анджэя Пачобута. Ход перамоваў такога тыпу заўсёды сутыкаецца з рознымі цяжкасцямі, пра якія я не магу тут згадаць. З іншага боку, працягваецца праца па вызваленні Анджэя Пачобута», – адзначыў Яцэк Севера, расказваючы, чаму Пачобута не апынулася ў абмене.
Польшча перадала Расеі супрацоўніка ГРУ Паўла Рубцова. Еўрадэпутат ад PiS Марыюш Камінскі назваў такую пастанову польскага ўраду ганьбай.
«Я не бачу ў гэтым ніякай ганьбы для ўрада і адміністрацыі Рэспублікі. Ці можна было чакаць большага? Заўсёды можна. Гэта праца апазіцыі – чакаць большага ад урада. У гэтым няма нічога дзіўнага», – сказаў Севера.
Ён лічыць, што «выгады, якія Рэспубліка можа атрымаць ад абмену Рубцова, рэалізаванага ў такой форме, значна больш, чым ад таго, што Рубцоў будзе сядзець у зняволенні». Севера таксама згадаў, што па лініі спецслужбаў перамовы вяліся на працягу многіх месяцаў.
«Польшча неаднаразова выкарыстоўвала абмен гэтай валюты, у тым ліку для атрымання інфармацыі аб шпіёнскіх сетках, якія да гэтага часу прыводзілі да забойстваў, падпалаў або дыверсій на тэрыторыі Рэспублікі», – адзначыў кіраўнік Бюро нацыянальнай бяспекі Польшчы.
Абмен зняволенымі паміж Расеяй і заходнімі краінамі адбыўся 1 жніўня ў Анкары. Беларусь была ўцягнутая ў гэты працэс праз нямецкага грамадзяніна Рыка Крыгера, якога ў Беларусі прысудзілі да пажыццёвага зняволення, але ў выніку вярнулі дадому ў рамках абмену.
Арсен Рудэнка belsat.eu
