Стала вядома, паводле якога артыкулу абвінавачваюць бабруйскага гісторыка.
10 верасня ў Менскім гарадскім судзе пройдзе суд над Ігарам Мельнікавым. У віну гісторыку ставяць «садзейнічанне экстрэмісцкай дзейнасці» паводле часткі 1 артыкула 361-4 Крымінальнага кодэксу, адзначае выданне «Наша Ніва». Працэс будзе весці суддзя Міхаіл Макарэвіч.
Максімальнае пакаранне па гэтым артыкуле – да шасці гадоў зняволення.
Вядома было, што Ігар Мельнікаў больш за паўгода знаходзіўся ў СІЗА, але інфармацыі аб тым, паводле якога артыкулу яго абвінавачваюць, не было. Апошняя публікацыя ў сацыяльных сетках гісторыка датуецца 21 студзеня 2024 года. Верагодна, першапачаткова яго затрымлівалі на содні, пасля якіх ён так і не выйшаў на волю.
Апошняя праца, якую Ігар Мельнікаў рыхтаваў да друку, была кніга «Прыступіць да ліквідацыі» пра факты з гісторыі барацьбы савецкай міліцыі і чэкістаў пасля Вялікай Айчыннай вайны супраць нацысцкіх памагатых і калабарацыяністаў.
Раман Шавель belsat.eu
