14-гадовага школьніка асудзілі на тры гады калоніі з адтэрміноўкай выканання пакарання за ілжывае паведамленне аб падрыхтоўцы выбуху. Пра гэта паведаміла Генеральная пракуратура Беларусі.
«Непаўналетні абвінавачаны ў траўні 2024 года з мэсэнджара Telegram даведаўся пра магчымасць накіравання з неўстаноўленай электроннай пошты загадзя ілжывага паведамлення аб небяспецы і падрыхтоўцы выбуху. Затым ён падаў карыстальніку Telegram звесткі аб паштовай скрыні адной з устаноў адукацыі, а таксама імя іншага непаўналетняга, ад якога паступіла загадзя ілжывае паведамленне аб мініраванні. У ім таксама паказвалася, што ў выпадку неперадачы грошай у навучальнай установе адбудзецца выбух», – піша Генпракуратура.
Падлетка асудзілі на тры гады калоніі з адтэрміноўкай два гады. Яго тэлефон канфіскаваны і «звернуты ў даход дзяржавы».
Пакуль прысуд не ўступіў у сілу і можа быць абскарджаны і апратэставаны ў апеляцыйным парадку.
Арсен Рудэнка belsat.eu
