У Вялікай Брытаніі ўжо тыдзень працягваюцца агрэсіўныя антыімігранцкія пратэсты, якія рушылі ўслед за забойствам дваіх дзяцей. З 30 ліпеня арыштавана 420 чалавек, паведамляе «Reuters». Прэм'ер-міністр Вялікай Брытаніі Кейр Стармер праводзіць экстранную нараду з кіраўнікамі паліцыі 5 жніўня.
З чаго ўсё пачалося?
29 ліпеня ў Саўпорце адбыўся напад на дзіцячы танцавальны клас, дзе праходзіў майстар-клас, прысвечаны Тэйлар Свіфт. Былі забітыя тры дзяўчынкі: Элсі Дот Станкомб (7 гадоў), Аліса Дасільва Агіяр (9 гадоў) і Бібі Кінг (6 гадоў).
Далей у Інтэрнэце з'явіўся фэйк, што нападнік – радыкальны ісламіст, які нядаўна прыбыў у Вялікую Брытанію. Паліцыя ж заявіла, што падазраваны нарадзіўся ў Вялікай Брытаніі і што гэта не тэрарыстычны акт.
Тады тэму падхапілі антыімігранцкія і антымусульманскія групоўкі. І за некалькі дзён разгарэліся пратэсты, падчас якіх былі спаленыя будынкі і аўтамабілі. Аб'екты, у якіх пражываюць просьбіты прытулку, таксама сталі аб'ектам нападаў.
Турмы гатовыя да прыёму «злачынцаў-галаварэзаў»
Міністр унутраных спраў Івет Купер заявіла, што ўдзельнікі беспарадкаў «адчулі ў сабе сілы распаліць расавую нянавісць»: яны кідалі цэглу ў паліцэйскіх, рабавалі крамы, нападалі на мячэці і прадпрыемствы, якія належаць выхадцам з Азіі. Яна адзначыла, што турмы гатовыя да прыёму «злачынцаў-галаварэзаў», паведамляе «The Guardian».
У выхадныя беспарадкі ўспыхнулі ў Ліверпулі, Брысталі, Тэмворце, Мідлсбра і Белфасце (Паўночная Ірландыя). Маладыя людзі ў балаклавах і з брытанскімі сцягамі кідалі камяні і крычалі «спыніце лодкі», маючы на ўвазе мігрантаў, якія прыбываюць на паўднёвае ўзбярэжжа ў апошнія гады.
У Ротэрхэме (Паўночная Англія) удзельнікі беспарадкаў супраць іміграцыі разбілі вокны гатэля «Holiday Inn Express», а затым зладзілі пажар. Прынамсі 10 паліцыянтаў атрымалі раненні, у тым ліку адзін з іх страціў прытомнасць. Адзін чалавек па гэтым факце ўжо арыштаваны, а астатнія ўдзельнікі беспарадкаў павінны «чакаць нас ля сваіх дзвярэй вельмі хутка», заявіла паліцыя.
У Болтане мусульманскія групы, якія выкрыквалі «Алаху Акбар», уступілі ў сутыкненне з ультраправымі бунтаўшчыкамі.
Паліцыя ўскладае адказнасць за гвалт на дэзінфармацыю ў Інтэрнэце, узмоцненую вядомымі асобамі. Адзін з іх Стывен Якслі-Ленан, ультраправы антыісламскі актывіст, які раней узначальваў антыісламскую групоўку «Лігу англійскай абароны».
Міністр унутраных спраў Івет Купер заявіла СМІ, што напружанасць узмацнілася і разгарэлася ў Інтэрнэце, і ўрад будзе разбірацца з кампаніямі сацыяльных сетак.
«Я думаю, што вы бачылі сеткі розных людзей і груп, якія спрабавалі раздуць полымя», – сказала яна.
Хоць яна адзначыла, што ў людзей ёсць свае погляды і асцярогі з нагоды такіх пытанняў, як іміграцыя, яна абвінаваціла ў гвалце экстрэмісцкія, расісцкія і жорсткія групы.
«Разумныя людзі, у якіх ёсць падобныя погляды і асцярогі, не бяруць у рукі цэглу і не кідаюць іх у паліцыю», – сказала яна.
Зараз павінна прайсці нарада па экстраным рэагаванні «Кобра». У ёй возьмуць удзел профільныя міністры і прадстаўнікі паліцыі, якія абмяркуюць меры ў адказ на найбліжэйшыя дні, каб не дапусціць паўтарэння жорсткіх сцэн.
Арсен Рудэнка, «Белсат»
