У ноч на суботу ў цэнтры Вільні мужчына напаў на дзвюх беларусак. Адна з іх расказала «Белсату» падрабязнасці здарэння. Лізавета прызналася, што яны з сяброўкай былі ў шоку і моцна спужаліся. Паліцэйскія ехалі 20 хвілінаў і, калі прыехалі, спыталі, чаму дзяўчыны ў такі час не ўдома.
Здарэнне адбылося каля апоўначы, калі беларускі чакалі таксоўку, каб паехаць дадому з цэнтру Вільні. Да іх прычапіўся мужчына, які ішоў насустрач.
«Ён пачаў кранаць маю сяброўку за плячо і спытаў на англійскай мове, ці размаўляе яна па-літоўску або па-англійску. Мы папрасілі яго не чапаць нас і пайшлі далей», — расказала «Белсату» адна з дзяўчат, Лізавета.
Мужчына нібыта пайшоў прэч, але потым знянацку пабег у бок сябровак, пачаў іх піхаць і крычаць па-англійску: «Не чапаць вас?!»
«Ён нас піхаў, але відочных цялесных пашкоджанняў няма. Хуткую мы не выклікалі, аднак вельмі моцна спужаліся. І маральна было вельмі цяжка пасля гэтага», — кажа дзяўчына.
Яна наракае, што на дапамогу ніхто не спяшаўся, хаця побач на чырвонае святло стаяла колькі аўтаў:
,,«Нам дапамог толькі адзін літовец. Ён быў у слухаўках і не бачыў здарэння, але пачуў крык і дачакаўся з намі паліцыі і супакойваў».
Паліцыянты ехалі хвілінаў 20, кажа Лізавета, хаця камісарыят там даволі блізка.
«Працаўнікі спачатку нас апыталі. Спыталі, чаму мы так позна ходзім, што мы робім знадворку ў такі час», — згадвае дзяўчына.
Паліцыянты прапанавалі дзве опцыі: ехаць адразу ў аддзел або падаць заяву онлайн. Днём у суботу Лізавета звярнулася ў камісарыят асабіста:
«Жанчына, якая прымала заяву, пыталася, ці было нам балюча або мы проста спужаліся, ці ёсць сінякі, папрасіла пазначыць, што сінякоў няма. Сказалі, што нам напішуць або патэлефануюць, калі ў следчага будуць якія-кольвек пытанні. Сяброўка заявы не пісала».
Дзяўчыне паабяцалі, што мужчыну будуць шукаць:
«Я казала, што там ёсць камеры назірання, што я маю відэа. Яны паабяцалі, што прагледзяць запісы, што будуць шукаць і мне трэба толькі чакаць».
Лізавета сцвярджае, што з сяброўкай аніяк мінака не правакавала, яны былі цвярозыя:
«Ад яго алкаголем не пахла, але ён вельмі дзіўна паводзіўся. Такія агрэсіўныя паводзіны — гэта ўжо дзіўна. Можа быць, у яго пэўныя псіхічныя адхіленні, можа, пад наркотыкамі быў».
Літоўская паліцыя гэтага здарэння яшчэ не каментавала.
Сцяпан Кубік, «Белсат»
