Кіроўцам, якія перавозяць людзей без дазволу, хочуць ануляваць візы.
Літва хоча зменшыць колькасць дазволаў на пасажырскія перавозкі з Беларусі прыкладна на палову. Кіроўцаў, якія займаюцца перавозкамі нелегальна, трэба пазбаўляць візаў, заявіў у эфіры радыё LRT кіраўнік Нацыянальнага цэнтру кіравання крызіснымі сітуацыямі Вілмантас Віткаўскас.
Літва хоча скараціць выдачу дазволаў на міжнародныя пасажырскія перавозкі з Беларусі з прычыны росту колькасці асобаў, якія перасякаюць мяжу. Таксама працягнуць правяраць кіроўцаў з мэтаю выяўлення нелегальных перавознікаў. Пры паўторным парушэнні можа паўстаць пытанне пра пазбаўленне візы.
Як паведаміў кіраўнік Літоўскай адміністрацыі транспартнай бяспекі Генюс Лукошус, на працягу апошніх шасці месяцаў праверылі больш за 60 аўтобусаў, якія перавозяць людзей з Беларусі і ў Беларусь, і «толькі адзінкі былі без парушэнняў».
Са словаў Лукошуса, таксама бываюць выпадкі, калі перавозка пасажыраў афармляецца як перавозка канкрэтнай групы асобаў (экскурсія), але ў адзін бок едуць адныя пасажыры, а вяртаюцца ўжо іншыя. Чыноўнік зазначыў, што гэта – сурʼёзнае парушэнне пагаднення паміж урадамі Літвы і Беларусі аб міжнародных аўтамабільных перавозках.
За парушэнне правілаў перавозкі пасажыраў накладаюцца штрафы ў памеры ад 2,5 да 3 тысячаў еўраў, за паўторнае парушэнне – ад 3 да 3,5 тысячы еўраў.
Паміж Літвой і Беларуссю цяпер існуюць 58 маршрутаў.
Літва імкнецца зменшыць колькасць грамадзянаў Беларусі, якія ўязджаюць у краіну, у інтарэсах нацыянальнай бяспекі і каб скараціць выпадкі кантрабанды, піша LRT. З гэтай прычыны разглядаецца закрыццё яшчэ двух памежных пунктаў у дадатак да двух, якія закрылі летась.
Спыніць рух транспарту, тавараў і людзей праз пункты пропуску «Лаварышкес» (з беларускага боку – «Катлоўка») і «Райгардас» («Прывалка») прапанавала камісія па нацыянальнай бяспецы Літвы.
18 жніўня 2023 года Літва закрыла першыя два з шасці пунктаў пропуску на мяжы з Беларуссю – «Шумскас» («Лоша» з беларускага боку) і «Цверачус» («Відзы»). У выніку колькасць літоўцаў, якія ездзяць у Беларусь, скарацілася на 37 %, а вось плынь беларусаў у Літву засталася амаль на тым жа ўзроўні.
Міністр унутраных справаў Агне Білатайце тады заявіла, што міністэрства прапануе закрыць яшчэ два пункты – «Лаварышкі» і «Райгард», аднак пытанне было адкладзенае. Калі гэтыя пункты закрыюць, то застануцца два памежныя пераходы: «Меднікі» («Каменны Лог») і «Салечнікі» («Беняконі»).
Марыя Міхалевіч belsat.eu
