Вайна ва Украіне. Падсумоўваем асноўныя падзеі на вечар 24 сакавіка.
«Белсат» падводзіць вынікі 760-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 24 сакавіка чытайце ў нашым аглядзе.
У Міністэрстве абароны РФ заявілі аб правядзенні мерапрыемстваў па выяўленні і знішчэнні дыверсійна-выведных групаў праціўніка каля мяжы з Украінай у Курскай і Белгародскай вобласцяў.
Аналітыкі праекту Deepstate гавораць, што сутычкі ў памежных раёнах Украіны і РФ працягваюцца, але іх інтэнсіўнасць істотна знізілася. Пры гэтым адзначаецца, што расейцы працягваюць знішчаць ударамі авіяцыі населеныя пункты Чарнігаўскай і Сумскай вобласцяў.
На купянскім кірунку цягам апошніх содняў сітуацыя заставалася адносна стабільнай: расейскае камандаванне піша пра контратакі праціўніка ў ваколіцах сяла Сынькоўка, пры гэтым зменаў лініі сутыкнення не фіксуецца.
На суседнім ліманскім кірунку, паводле Генштабу ЗСУ, войскі РФ прынамсі восем разоў атакавалі каля населеных пунктаў Церны, Ямпалаўка, Вясёлае і Спірнае ў Данецкай вобласці, а таксама каля Белагораўкі на Луганшчыне, але поспеху не дасягнулі.
Між тым у Deepstate паведамляюць, што расейцы прасунуліся на тэрыторыі Серабранскага лясніцтва (Луганская вобласць) з паўночнага ўсходу ад вышыні 81,5 метра.
Расейскі ваенкор Сямён Пегаў гаворыць, што пад Цернамі контратакуюць Збройныя сілы, імкнучыся вярнуць раней страчаныя пазіцыі.
На бахмуцкім кірунку войскі РФ ціснуць з захаду і поўдня ад аднайменнага раённага цэнтру, імкнучыся выйсці да суседняга гораду Часаў Яр.
Украінскі бок піша пра 15 безвыніковых атак праціўніка каля сёлаў Багданаўка, Іванаўскае і Клішчыеўка.
Пры гэтым у Deepstate гавораць, што УС РФ маюць поспехі каля гораду Часаў Яр і сяла Іванаўскае.
Разам з тым пакуль не пацвярджаецца ранейшая заява Мінабароны РФ пра захоп Іванаўскага.
Прарасейскі тэлеграм-канал «Рыбарь» піша, ЗСУ абараняюцца на заходніх ускрайках сяла, да якіх прымыкае ўрочышча Ступкі – тут на ўзвышшы размяшчаюцца добраўмацаваныя пазіцыі ўкраінцаў, з якіх ажыццяўляецца агнявы кантроль заходняй часткі Іванаўскага.
Паводле крыніцы, цяпер войскі РФ намагаюцца абысці ўрочышча з поўдня.
Праўкраінскі Тэлеграм-канал «Говорять Снайпер» сцвярджае, што ЗСУ кантралююць паўднёва-заходнюю частку Іванаўскага. Але пры гэтым адзначаюцца спробы расейцаў перарэзаць лагістыку сілаў абароны з населеным пунктам.
На аўдзееўскім кірунку расейскія вайскоўцы намагаюцца развіць поспех на захадзе ад раней занятага аднайменнага гораду.
У Deepstate фіксуюць прасоўванні войскаў РФ на поўначы ад сяла Арлоўка і з поўдня ад Танэнькага. Таксама аналітыкі адзначаюць спробы расейцаў выйсці з Арлоўкі да паўднёвых ускрайкаў Сямёнаўкі, паколькі на ўсходзе ад апошняга населенага пункту знаходзяцца водныя перашкоды.
Пегаў гаворыць, што без захопу Сямёнаўкі расейцам будзе складана выбіць ЗСУ з сяла Бэрдычы, дзе цяпер ідуць сустрэчныя баі.
Прарасейскі ваенны эксперт Барыс Рожын фіксуе ціск войскаў РФ у ваколіцах сёлаў Первамайскае і Невельскае, але там расейцы пакуль не могуць прасунуцца, што звязваецца з недахопам боепрыпасаў.
На навапаўлаўскім кірунку, паводле Генштабу ЗСУ, расейцы цягам содняў не менш за 30 разоў атакавалі каля населеных пунктаў Краснагораўка, Георгіеўка, Пабеда, Новаміхайлаўка і Канстанцінаўка.
Прасоўванняў войскаў РФ не фіксуецца, але ім удалося замацавацца на поўдні ад Краснагораўкі, адкуль яны цяпер і штурмуюць сам горад.
На бярдзянскім кірунку працягваюцца цяжкія баі за пасадку каля сяла Ураджайнае. Паводле Deepstate, ЗСУ адбілі большую частку атак праціўніка, расейцы намагаюцца замацавацца.
У Мінабароны РФ пішуць, што іхныя вайскоўцы палепшылі становішча тактычнае становішча на гэтым участку фронту, што пацвярджае словы аналітыкаў.
Таксама УС РФ прасунуліся на захадзе ад суседняга сяла Старамаёрскае.
У Запарожскай вобласці баявыя дзеянні лакалізуюцца з поўдня ад гораду Арэхаў паміж сёламі Вэрбовае і Работына. У руінах апошнях населенага пункту расейцы намагаюцца замацавацца, але ў выніку нясуць вялізныя страты.
У Херсонскай вобласці войскі РФ двойчы атакавалі ў сяле Крынкі на левым беразе Дняпра, але выбіць ЗСУ з займанага плацдарму не здолелі.
Тэлеграм-канал «Говорять Снайпер», спаслаўшыся на байца сілаў абароны, піша пра жудасную лагістыку паміж Крынкамі і правым берагам: большая частка стратаў ідзе пры пераправе цераз Дняпро, пры гэтым многія параненыя на левабярэжжы вымушаныя па некалькі тыдняў чакаць эвакуацыі.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
