Фільм-успамін пра выбітнага паэта, філосафа, мастака, дызайнера Міхала Анемпадыстава.
Людзі, якія мелі сваё меркаванне, уласны погляд на шмат якія рэчы, заўсёды былі не зручныя ўладам Беларусі. Бо яны маглі паўплываць на свядомасць іншых, падзяліўшыся досведам і ведамі, а гэта праблема для рэжыму.
Такім нязручным чалавекам быў для ўладаў і Міхал Анемпадыстаў – паэт, філосаф, мастак, дызайнер, мастацтвазнаўца. Ён адзін са стваральнікаў беларускай рок-паэзіі, аўтар культавага музычнага праекту «Народны альбом» (1997), які прыдумаў і да якога напісаў тэксты. Яго стварэнне Міхал лічыў сваім галоўным дасягненнем у жыцці. І сапраўды, гэты праект моцна гучаў на пляцоўках Беларусі, Польшчы і нават Францыі.
Творчасць Міхала Анемпадыстава – гэта і жывапіс, і вершы, і дызайнерскія і графічныя працы. Ягоным творам не знайшлося месца ў афіцыйных структурах Беларусі, але ягоныя таленты ўшанаваныя па-за межамі радзімы.
Цёплымі ўспамінамі пра свайго сябра і калегу Міхала Анемпадыстава ў новым фільме «Белсату» дзеляцца музыкі Лявон Вольскі, Піт Паўлаў, дырэктарка тэлеканалу «Белсат» Агнешка Рамашэўская-Гузы, ейны намеснік Аляксей Дзікавіцкі, мастак Лявон Тарасевіч і іншыя.
Аўтарка: Вольга Воранава, 2023 год
belsat.eu
