Галантарэйнік і кардынал: два выказванні Лукашэнкі з нагоды ракетнай базы
06.11.2018, 19:15
Belsat
podpis źródła zdjęcia
Яшчэ ўчора Аляксандр Лукашэнка пераконваў польскага міністра замежных справаў Яцэка Чапутовіча: маўляў, не патрэбная вам ніякая ракетная база, а то мы з Расеяй будзем вымушаныя адказваць. А сёння, вось як павярнулася: кажа ўжо зусім іншае. «Надуманая праблема. Мы ў вайскова-палітычным саюзе з Расеяй. Будзе вайсковая база, не будзе – розніцы абсалютна ніякай няма. І мы гэтай базы не размяшчаем тут не таму, што мы хочам вам ці каму-небудзь паказаць, што мы суверэнныя і незалежныя. Мы яе не размяшчаем, бо яна тут не патрэбная. Мы самі, паводле нашай задумы, ваеннаабарончага плану з Расейскай Федэрацыяй, забяспечваем тыя функцыі, якія на нас ускладзеныя», – цытуе кіраўніка дзяржавы дзяржаўнае інфармацыйнае агенцтва.
Яшчэ ўчора Аляксандр Лукашэнка пераконваў польскага міністра замежных справаў Яцэка Чапутовіча: маўляў, не патрэбная вам ніякая ракетная база, а то мы з Расеяй будзем вымушаныя адказваць. А сёння, вось як павярнулася: кажа ўжо зусім іншае. «Надуманая праблема. Мы ў вайскова-палітычным саюзе з Расеяй. Будзе вайсковая база, не будзе – розніцы абсалютна ніякай няма. І мы гэтай базы не размяшчаем тут не таму, што мы хочам вам ці каму-небудзь паказаць, што мы суверэнныя і незалежныя. Мы яе не размяшчаем, бо яна тут не патрэбная. Мы самі, паводле нашай задумы, ваеннаабарончага плану з Расейскай Федэрацыяй, забяспечваем тыя функцыі, якія на нас ускладзеныя», – цытуе кіраўніка дзяржавы дзяржаўнае інфармацыйнае агенцтва.
Не, фармальна тут няма нават лагічнай супярэчнасці. Сёння патрэбы няма, а вось зʼявіцца база на тэрыторыі Польшчы – і патрэба паўстане, як наступства гэтага не зусім сяброўскага (у дачыненні найбліжэйшага саюзніка Беларусі) кроку. «Будзем вымушаныя адказваць» – «мы з Расеяй»! Гэта, вядома, нагадвае саюз галантарэйніка і кардынала з памятнай экранізацыі раману Аляксандра Дзюма, але тут галоўнае, каб галантарэйнік у саюзе не расчараваўся. Для ўсіх галоўнае.
Расейскія войскі ў Беларусі. Пасля вучэнняў «Захад-2017»
Менавіта таму Крэмль дагэтуль ніяк не рэагуе на нейкія публічныя выказванні дарагога саюзніка з нагоды ракетнай базы. У нас жа быў прэцэдэнт, праўда, не ў вайскова-палітычнай сферы, а ў эканамічнай. Доўга, нудна, з крыкамі ды папрокамі беларускі бок адмаўляўся прадаваць «Газпрому» «Белтрансгаз». А потым неяк няўзнак прадалі. І ўсе крыкі адразу сціхлі, папрокі спыніліся. Падобна на тое, галантарэйнік зразумеў, хто з дваіх напраўду кардынал.
Дарадцы Аляксандра Рыгоравіча чамусьці не патлумачылі яму, што ягоныя выказванні наконт абароннага саюзу з Расеяй і базаў не толькі нікога з яго слухачоў не супакойваюць, але наадварот – насцярожваюць. Чым больш кажа на гэтую тэму прэзідэнт Беларусі, тым больш іранічна гучыць маўчанне Расеі (так, маўчанне часам бывае вельмі гучнае).
,,
Чым даўжэй маўчыць Расея, тым больш насцярожваюцца нашыя заходнія суседзі: яны ж дакладна ведаюць пра паўнамоцтвы галантарэйніка Банасье. Ведаюць, ад каго на самой справе залежыць размяшчэнне ракетнай базы на тэрыторыі Беларусі: крэдыторам, як вядома, цяжка адмовіць, калі яны маюць дастаткова вэксаляў, якія можна ў любы момант прад’явіць.
Расейскія жаўнеры. Фота https://ria.ru/
А нашая краіна – дзякуй ураду і прэзідэнту – перад Расеяй па горла ў пазыках. Прычым пазыкі растуць з такой катастрафічнай хуткасцю, што ніякія крэдыты найлепшага сябра Ільхама Аліева ўжо не дапамогуць абараніць беларускага суверэнітэту, калі Расея сапраўды вырашыць усталяваць гэтую клятую базу ў нас дзе-небудзь на Гомельшчыне. Ёй, у прынцыпе, абыякава, але калі раптам захочацца тузануць беларускага тыгра за вусы – чаму б і не? А раптам ён зноў акажацца падатлівы і ласкавы, як коцік?
І, падобна, так і будзе. І гэта самае сумнае ва ўсёй сітуацыі. І мы будзем горача тлумачыць усім, што справа ў той самай базе, якую на сваёй тэрыторыі размясціла Польшча! І з гэтым нічога не зробіш: у Банасье на ўсё гатовы адказ. А кардынал зноў іранічна прамаўчыць.
