Навошта сабраліся, калі спрачацца пра лёсы краіны не збіраліся?
На мінулым тыдні мы маглі назіраць за чарговым з’ездам Камуністычнай Партыі БССР, ну або як яго зараз называюць Усебеларускім Народным Сходам. Амаль 1200 дэлегатаў з усёй краіны зʼехаліся ў сталіцу. Ніякага шматгалосся, розніцы меркаванняў, ніякай дыскусіі не было прадугледжана. Як сказаў сам Лукашэнка – у залі былі толькі лукашысты, толькі ябацькі.
У мяне ўзнікае пытанне – а навошта сабраліся, калі спрачацца пра лёсы краіны не збіраліся? Ну па-першае каб паспаць. Прапагандыст Ігар Тур ледзь трымаўся: каб не заснуць. Гэта той Ігар Тур, які раней звяртаўся да чыноўнікаў:
«Я бы вельмі хацеў прасіць вас на сустрэчах з кіраўніком дзяржавы, да і на любых нарадах, дзе ёсць тэлекамеры ўсё ж такі знаходзіць у сабе сілы і быць сабранымі. Таму што калі вы выпадкова закемарыце на галёрцы… пазней я, як і ўсе мае калегі з пула, на мантажы спрабуем выразаць гэтыя фрагменты».
Ну вось, Ігар, як бачыш твае калегі не выразалі, прыгадалі табе твае ж словы. Але Тура можна зразумець, у прапагандыста была цяжкая ноч. Прадстаўнікі Белпола змаглі дастаць узор ягонага пасведчання дэлегата і пазычылі нам на гэтую праграму. Ігар разумее, як блізка да яго падкраліся, і ад гэтага спіцца вельмі трывожна.
Але вернемся да таго, навошта ж праводзілі гэты зʼезд лукашыстаў? Каб распавесці вам усім, што так добра вы яшчэ ніколі не жылі. Дыктатар сыпаў лічбамі, што ў 90-тых беларус мог купіць сабе толькі 20 кілаграмаў мяса, 13 кілаграмаў сыру або масла. Затое зараз вы можаце набыць сабе 100 кілаграмаў мяса, а сыру з маслам 46.
,,Я толькі аднаго не разумею, калі жыць так добра, то чаму беларусы сотнямі тысячаў бягуць у суседнія краіны, а праблема недахопу кадраў у Беларусі стаіць востра як ніколі? Можа таму, што ў суседніх краінах, дзе ў 90-тыя жыхары таксама, як і мы, маглі набыць толькі 20 кілаграмаў мяса – сёння ўжо не мераюць свой дабрабыт сырам і мясам?
Бо выдаткі на харчовыя тавары, як у тых жа палякаў ці літоўцаў, складаюць 15-20 адсоткаў ад заробку, а ў беларусаў ажно 40?
Я чытаю гісторыі пра лекара-беларуса, які працуе на радзіме на 2 стаўкі, а абутак дзецям у школу купляе ў растэрміноўку. Бо не хапае на жыццё. Гэтым хваліцца Лукашэнка перад ябацькамі? Гэта вынік 30 гадоў трымання пасінелымі пальцамі за ўладу?
Што тычыцца самаго сходу, то я яго ўспрымаю як такую форму цім-білдзінга. Гэта калі нейкая фірма за ўласны кошт вывозіць сваіх супрацоўнікаў на супольную сустрэчу. У карпарацыі лукашыстаў таксама ёсць такая традыцыя цім-білдзінга – завецца яна Усебеларускі Народны Сход. Але не дайце сябе падмануць, нягледзячы на назву, яна не мае ніякага дачынення да беларускага народу.
belsat.eu
