Ужо парамантавалі, кажуць на гарачай лініі.
Вялізарныя чэргі на выезд з Беларусі ў Літву і Польшчу назіраюцца раніцай 9 чэрвеня. На гарачай лініі Памежнага камітэту запэўніваюць, што збой удалося выправіць, а праблемаў з выездам не мусіць быць.
Паводле інфармацыі Дзяржаўнага памежнага камітэту, на 10:00 у Каменным Лозе на выездзе ў Літву чакала больш за 790 грузавых машын, у Катлоўцы – 540, у Беняконях – 380. У Бераставіцы на выездзе ў Польшчу – больш за 470. Але чэргі на выезд легкавікоў невялікія, па пару дзясяткаў машынаў.
Апоўначы 9 чэрвеня па ўсёй Беларусі зламалася мытная сістэма – на ўсіх пунктах пропуску прыпынілі выезд з Беларусі і ўезд у краіну. Мытнікі сталі запаўняць дакументы ўручную, на мяжы ўтварыліся вялікія чэргі. Пра гэта паведаміў Telegram-канал «МотолькоПомоги» са спасылкай на сваіх чытачоў. Чытачы «Белсату» пацвердзілі інфармацыю.
А 8-й раніцы праблема захоўвалася, але а 9-й «сталі трохі рухацца», паведаміў чытач з пункту пропуску «Бераставіца», што на дарозе з Ваўкавыску на Беласток.
Як расказалі «Белсату» чытачы, людзі, якія вярталіся з Польшчы праз пераход у Берасці, пераходзілі мяжу пешшу (звычайна на пераходзе Тэрэспаль – Берасце такая опцыя адсутнічае). Тым, хто жыве ў абласным цэнтры, каля 3-й гадзіны ночы памежнікі дазволілі мінуць мяжу на сваіх нагах і рухацца дадому.
Паводле звестак чытачоў «МотолькоПомоги», збой у сістэме быў выкліканы адключэннем электычнасці ў сервернай, дзе чамусьці няма рэзервовага сілкавання. Збой, сцвярджае крыніца, не першы раз адбываецца з гэтай прычыны.
На гарачай лініі Памежнага камітэту запэўніваюць, што «ўсё ўжо аднавілі». Кажуць, сапраўды «мытнікі паламалі нешта ў сябе, доўга афармлялі транспарт уручную», але цяпер усё працуе.
Звесткі пра чэргі на мяжы на сайце Памежнага камітэту цяпер аптымістычныя: напрыклад, на «Бераставіцы», адкуль чытач нядаўна прысылаў нам фота чэргаў, цяпер паказвае чаргу на 30 легкавікоў. На гарачай лініі запэўніваюць: раз так напісана, то каля 30 і ёсць, звесткі абнаўляюцца раз на дзве гадзіны. Праблемаў з выездам сёння не павінна быць, пераконваюць на гарачай лініі.
Звязацца з пунктам пропуску «Бераставіца» не ўдалося, слухаўку не здымаюць. Онлайн-камеры на ўсіх беларускіх пунктах пропуску цяпер «часова недасяжныя».
Глеб Нержын, Алесь Наваборскі belsat.eu
