«Белсат» падводзіць вынікі апошніх содняў поўнамаштабнай вайны.
«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 17 чэрвеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 33 150 чалавек забітымі.
Цягам апошніх содняў на Данецкім і Луганскім напрамках расейцы працягвалі наступ на Славянск, правялі няўдалую спробу штурму гораду Залатое, а таксама намагаліся ўзяць пад поўны кантроль Севераданецк. Пры гэтым кіраўнік Луганскай абласной адміністрацыі Сяргей Гайдай паведаміў, што эвакуацыя з Севераданецкага заводу «Азот», у сховішчы якога знаходзіцца 568 чалавек, у тым ліку 38 дзяцей, немагчымая, паколькі горад няспынна абстрэльваецца.
На іншых участках лініі сутыкнення на Данбасе войскі РФ не вялі наступальных дзеянняў, але актыўна ўжывалі артылерыю і сістэмы залпавага агню.
За межамі Усходняй зоны аперацыі расейцы ў асноўным умацоўвалі свае пазіцыі ды праводзілі ратацыю сярод асабовага складу. Адзначаецца, што на Харкаўскім напрамку расейцы трымалі абарону, каб не дапусціць прарыву ўкраінскіх сілаў да дзяржаўнай мяжы і ў тыл войскаў, якія дзейнічаюць на Славянскім напрамку. Таксама паведамляецца, што ўкраінская авіяцыя нанесла ўдары па вялікіх групах праціўніка ў Херсонскай вобласці, у выніку чаго расейцы панеслі значныя страты ў жывой сіле.
Разам з тым Інстытут вывучэння вайны (ISW) паведаміў, што расейскія войскі могуць учыніць напады пад фальшывым сцягам каля Херсону, каб спыніць падтрыманне насельніцтвам украінскіх контрнаступальных аперацыяў.
У Інстытуце вывучэння вайны таксама гавораць, што ўкраінскія сілы могуць аднавіць наступальныя аперацыі на захад ад Ізюму. На гэта ўказвае тое, што ў сеціве зʼявіліся звесткі пра ўсталяванне пантоннага мосту праз раку Северскі Данец прыкладна за 26 км ад гораду на захад, а таксама пра агонь расейскай артылерыі на захадзе і паўночным захадзе ад Ізюму.
Ранкам 17 чэрвеня ВМС Украіны паведамілі пра ўдар супрацькарабельнай ракетай «Harpoon» па расейскім вайсковым буксіры «Василий Бех», які транспартаваў на востраў Змяіны боепрыпасы, узбраенне і асабовы склад Чарнаморскага флоту РФ. На борце карабля таксама быў зенітна-ракетны комплекс «Тор». Афіцэр ЗСУ і валанцёр Міраслаў Гай заявіў, што на караблі «Василий Бех» распачаўся пажар, шмат забітых і параненых. Расейскі бок пакуль не каментуе гэтых звестак.
Уладзімір Зяленскі сабраў пасяджэнне Савету нацыянальнай бяспекі і абароны Украіны з-за асцярогі ўварвання з боку Беларусі. На ім прэзідэнт даручыў праверыць гатоўнасць да магчымага ўварвання ў чатырох пагранічных вобласцях Украіны.
Тым часам Аляксандр Лукашэнка заявіў, што беларуская армія не пойдзе ваяваць ва Украіну, але ў выпадку чаго адкажа на ракетны ўдар па тэрыторыі РБ.
Ювенальныя пракуроры Украіны паведамілі, што па стане на 17 чэрвеня ў краіне ад расейскай агрэсіі пацярпелі больш за 900 дзяцей: 322 дзіця загінулі, яшчэ 581 атрымалі раненні. Таксама пра расейскі абстрэлы былі пашкоджаныя 2028 установаў адукацыі, з 209 цалкам разбураныя.
Віцька Кавалак belsat.eu
