Падсумоўваем асноўныя падзеі на вечар 2 студзеня.
«Белсат» падводзіць вынікі 678-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 2 студзеня чытайце ў нашым аглядзе.
У Генеральным штабе Збройных сілаў Украіны паведамілі пра адбіццё 7 атак праціўніка каля населеных пунктаў Сынькоўка і Петрапаўлаўка на паўночным усходзе Харкаўскай вобласці.
Пры гэтым у Міністэрстве абароны РФ пішуць пра шэраг няўдалых атак ЗСУ каля Сынькоўкі, што ўказвае на працяг сустрэчных баёў на гэтым участку фронту.
Самыя ўкраінскія вайскоўцы, якія займаюць пазіцыі каля сяла, гавораць, што сітуацыя знаходзіцца пад іхным кантролем.
На суседнім ліманскім кірунку войскі РФ ціснуць у бок сяла Церны на поўначы Данецкай вобласці, але пакуль лінія фронту застаецца нязменнай.
На бахмуцкім кірунку, паводле ўкраінскага камандавання, сілы абароны краіны адбілі 10 атак праціўніка каля населеных пунктаў Багданаўка, Клішчыеўка і Андрэеўка.
Між тым прарасейскі ваенны эксперт Барыс Рожын піша пра невялікія прасоўванні УС РФ каля сяла Курдзюмаўка (на поўдні кірунку). Гэтую інфармацыю ўскосна пацвярджаюць і аналітыкі праекту Deepstate.
Украінскае камандаванне паведамляе, што на поўначы аўдзееўскага кірунку сілы абароны адбілі чатыры атакі праціўніка каля населеных пунктаў Стэпавое, Новабахмутаўка і Аўдзееўка.
Разам з тым прарасейскі ваенкор Сямён Пегаў фіксуе прасоўванні войскаў РФ у бок сяла Бэрдычы (на паўночным захадзе ад Аўдзееўкі). Аналагічную інфармацыю падаюць і ў Deepstate.
Пры гэтым на поўдні аўдзееўскага кірунку фіксуецца павелічэнне наступальнай актыўнасці расейцаў: тут цягам содняў ЗСУ адбілі не менш за 19 атак праціўніка каля сёлаў Первамайскае і Невельскае.
На мар’інскім, паводле Пегава, ідуць цяжкія сустрэчныя баі каля Новаміхайлаўкі і на захадзе ад Мар’інкі.
Прарасейскі тэлеграм-канал «Два майора» адзначае заняцце расейцамі некалькіх пазіцыяў ЗСУ каля Новаміхайлаўкі.
На паўднёвым захадзе Данецкай вобласці Узброеныя сілы РФ праводзілі штурмавыя дзеянні каля сяла Старамаёрскае, але былі спыненыя сіламі абароны Украіны.
У Запарожскай вобласці працягваюцца баі на выступе па фронце з поўдня ад гораду Арэхаў. Атакі абодвух бакоў фіксуюцца каля населеных пунктаў Работына, Навапрокапаўка і Вэрбовае. Па словах ваенкора Пегава, каля апошняга сяла ЗСУ вярнулі частку раней страчаных пазіцыяў.
Канал «Два майора» піша, што ЗСУ перайшлі да манеўрынай абароны і ўпэўнена трымаюць пазіцыі каля вышэйзгаданых сёлаў. Адначасова з гэтым украінцы пачалі ўзводзіць другую лінію абароны на сваіх тылавых пазіцыях.
На херсонскім кірунку працягваюцца баі на левым беразе Дняпра, дзе ЗСУ працягваюць утрымліваць некалькі невялікіх плацдармаў. Паводле ўкраінскага камандавання, за апошнія содні сілы абароны краіны адбілі 19 штурмаў сваіх пазіцыяў.
Акрамя гэтага 2 студзеня Узброеныя сілы РФ здзейснілі чарговую масіраваную паветраную атаку тэрыторыі Украіны.
Напачатку ўночы яны запусцілі 35 БпЛА «Shahed-136/131», якія ў выніку былі збітыя сіламі супрацьпаветранай абароны краіны. Ужо ранкам расейцы з дапамогаю авіяцыі, флоту і ЗРК запусцілі 99 ракетаў рознага тыпу, 72 з якіх былі знішчаныя СПА Украіны.
Адзначаецца, што ўдар наносіўся па аб’ектах цывільнай і крытычнай інфраструктуры, прамысловых і вайсковых аб’ектах. Пры гэтым асноўны кірунак удару прыйшоўся на Кіеў.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
