Падсумоўваем асноўныя падзеі на вечар 6 студзеня.
«Белсат» падводзіць вынікі 682-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 6 студзеня чытайце ў нашым аглядзе.
На паўночным усходзе Харкаўскай вобласці працягваюцца баі ў ваколіцах сяла Сынькоўка ў Купянскім раёне: у Генеральным штабе Збройных сілаў Украіны паведамілі пра сем няўдалых атак праціўніка на гэтым участку фронту, у Міністэрстве абароны РФ заявілі пра чатыры адбітыя контратакі ўкраінцаў. У гэты ж час расейскі ваенкор Сямён Пегаў гаворыць, што баі ідуць у самім населеным пункце.
Аналітыкі амерыканскага інстытута вывучэння вайны мяркуюць, што войскі РФ рыхтуюцца да маштабнага наступу на горад Купянск цягам наступных тыдняў.
На ліманскім кірунку, паводле тэлеграм-каналу «Два майора», ідуць баявыя дзеянні на так званым торскім выступе і на тэрыторыі Серабранскага лясніцтва – паўсюль крыніца фіксуе прасоўванні войскаў РФ.
Па інфармацыі ўкраінскага камандавання, у ваколіцах Бахмуту ЗСУ адбілі тры атакі праціўніка каля сёлаў Клішчыеўка і Андрэеўка.
Пегаў піша, што таксама на бахмуцкім кірунку ідуць баі каля Хромава і Багданаўкі, прычым каля апошняга населенага пункту яны маюць сустрэчны характар.
Высокая інтэнсіўнасць наступальных дзеянняў расейцаў па-ранейшаму фіксуецца ў ваколіцах Данецку.
На аўдзееўскім кірунку, паводле Генштабу ЗСУ, толькі за апошнія содні сілы абароны краіны адбілі не менш за 21 атаку каля населеных пунктаў Новабахмутаўка, Аўдзееўка, Первамайскае і Невельскае.
Між тым прарасейскі тэлеграм-канал «Белорусский силовик» паведамляе, што УС РФ прасунуліся ў бок сяла Ачэрэтына і з поўдня ад Вясёлага.
Канал «Два майора» фіксуе цяжкія баі каля Стэпавога.
Сямён Пегаў гаворыць, што каля сяла Невельскае контратакавалі ЗСУ, а ў ваколіцах Первамайскага ідуць сустрэчныя баі.
На суседнім мар’інскім кірунку ўкраінскі бок адзначае 15 няўдалых атак праціўніка каля населеных пунктаў Мар’інка, Пабеда і Новаміхайлаўка.
Паводле тэлеграм-каналу «Два майора», Узброеныя Сілы РФ за содні прасунуліся ў бок Георгіеўкі (на захадзе ад Мар’інкі), а таксама каля Пабеды.
У Мінабароны РФ заявілі пра адбіццё контратакі ЗСУ каля Георгіеўкі.
Ваенкор Пегаў удакладняе, што войскі РФ атакуюць пазіцыі ўкраінцаў у Новаміхайлаўцы з поўдня, паўднёвага ўсходу і паўночнага ўсходу. Але тут ЗСУ ўдаецца стрымліваць праціўніка.
На поўдні Украіны ідуць сустрэчныя баі каля населеных пунктаў Работына, Навапрокапаўка і Вэрбовае ў Запарожскай вобласці (на поўдні ад гораду Арэхаў). Зменаў лініі фронту не зафіксавана.
У Херсонскай вобласці працягваюцца баі за сяло Крынкі на левым беразе Дняпра, а таксама на астравах у рэчышчы.
Украінскі Генштаб піша пра 13 няўдалых штурмаў сваіх пазіцыяў з боку праціўніка.
Прарасейскі тэлеграм-канал «Позывной OSETIN» сцвярджае, што расейцы занялі некалькі астравоў пад поўны кантроль, скарыстаўшыся тым, што ЗСУ кінулі асноўныя сілы на ўтрыманне Крынак.
Акрамя гэтага крыніца адзначае няўдалыя спробы ўкраінцаў перакінуць рэзервы на левабярэжжа.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
