Вайна ва Украіне. Падсумоўваем асноўныя падзеі на вечар 21 студзеня.
«Белсат» падводзіць вынікі 697-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 21 студзеня чытайце ў нашым аглядзе.
Увечары 20 студзеня прарасейскія крыніцы пачалі паведамляць пра захоп Узброенымі сіламі РФ сяла Крухмальнае ў Харкаўскай вобласці. Ужо 21 чысла пра гэта заявілі і ў Міністэрстве абароны РФ, пасля чаго інфармацыю пацвердзілі і ва ўкраінскім камандаванні, назваўшы адыход сілаў абароны неабходнай мерай, здзейсненай дзеля захавання асабовага складу.
Прарасейскі тэлеграм-канал «Рыбарь» сцвярджае, што таксама войскі РФ прарвалі абарону ЗСУ на паўднёвым захадзе ад населенага пункту і наблізіліся да суседняга сяла Бераставое. Таксама існуе верагоднасць таго, што расейцы цалкам занялі ўчастак дарогі Н-26 да Навасёлаўскага, якое часткова знаходзіцца пад іхным кантролем.
Між тым сёлы Крухмальнае і Бераставое знаходзяцца ў нізіне адносна наваколля, а каля Навасёлаўскага знаходзіцца вышыня 167,5 метра, што ўскладняе далейшы наступ Узброеных сілаў РФ на гэтым участку фронту. У такой сітуацыі больш лагічным выглядае далейшы ціск расейцаў у бок населеных пунктаў Табаеўка і Пясчанае, заняцце якіх дазволіць падысці з поўдня да ўкраінскай групоўкі ў горадзе Купянск.
Таксама на купянскім кірунку, паводле Генштабу ЗСУ, расейскія вайскоўцы 21 раз атакавалі каля населеных пунктаў Сынькоўка, Петрапаўлаўка і Стэльмахаўка, але поспеху не дасягнулі.
На суседнім ліманскім кірунку наступальныя дзеянні расейцаў зафіксаваныя каля сёлаў Церны і Ямпалаўка на поўначы Данецкай вобласці, а таксама на тэрыторыі Серабранскага лясніцтва і ў ваколіцах Белагораўкі на Луганшчыне. Тут сілы абароны Украіны адбілі не менш за 11 атак праціўніка.
На бахмуцкім кірунку расейцы наступаюць на захадзе і поўдні ад раённага цэнтру ў ваколіцах населеных пунктаў Багданаўка, Клішчыеўка, Андрэеўка і Іванаўскае.
Асобныя прарасейскія крыніцы публікуюць відэа з усталяваннем сцягу РФ у Багданаўцы, але факт пераходу населенага пункту пад кантроль РФ адмаўляецца іншымі крыніцамі: так, тэлеграм-канал «Romanov Лайт» адзначае, што войскі РФ кантралююць толькі паўночна-ўсходнюю частку Багданаўкі. Аналагічнай думкі прытрымліваюцца і аналітыкі праекту Deepstate.
Маштабная наступальная аперацыя расейскіх вайскоўцаў працягваецца і ў ваколіцах Данецку. Паводле ўкраінскага камандавання, толькі за апошнія содні на аўдзееўскім кірунку сілы абароны краіны адбілі прынамсі 12 атак каля населеных пунктаў Севернае, вадзяное, Первамайскае і Невельскае, а таксама яшчэ 11 – у ваколіцах самой Аўдзееўкі.
Пры гэтым у Deepstate пішуць, што на поўдні гораду сітуацыя застаецца крытычнай для ЗСУ: тут расейцы намагаюцца замацавацца на вуліцах Чарнышэўскага, Спартыўнай і Саборнай. Адзначаецца, што ў выпадку поспеху УС РФ, пад пагрозай апынецца ўся ўсходняя частка Аўдзееўкі і ваколіцы.
На мар’інскім кірунку расейцы наступаюць у ваколіцах Георгіеўкі, Мар’інкі і Новаміхайлаўкі.
Аналітыкі Deepstate фіксуюць частковы поспех расейцаў у Георгіеўцы.
Расейскі ваенкор Сямён Пегаў гаворыць, што Новаміхайлаўку УС РФ штурмуюць з поўначы і поўдня, але пакуль не могуць прасунуцца.
На поўдні Данецкай вобласці расейцы наступалі з поўдня ад сяла Ураджайнае: напачатку ім удалося выбіць ЗСУ з часткі пазіцыяў, але замацавацца войскі РФ так і не змаглі – пазіцыі зноў перайшлі пад кантроль сілаў абароны.
Акрамя гэтага расейскія вайскоўцы спрабавалі штурмаваць пазіцыі праціўніка каля Новаданецкага, але страцілі танк на міне і адышлі.
У Запарожскай вобласці Узброеныя сілы РФ атакуюць на захадзе ад сяла Вэрбовае (з поўдня ад гораду Арэхаў), але поспеху не маюць.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
